Нимаи дуюми имрӯз иштирокчиёни форуми ҷавонон баъди дидани ноҳияи Айнӣ ба шаҳри Панҷакент сафар намуданд.

Дар шаҳри Панҷакент нахуст ҷавонон ва блогерони кишвар аз Муассисаи давлатии “Маҷмааи ҷумҳуриявии таърихию фарҳангии Панҷрӯд”, ки он аз оромгоҳ, осорхона ва китобхонаи сардафтари адабиёти классикии тоҷик Абуабдуллоҳ Рӯдакӣ иборат аст, дидан карданд.

Дар идома ҳар як блогер, ки аксарияти онҳо аз сад ҳазор то як миллион обуначӣ дар шабакаҳои иҷтимоӣ доранд, маҷмааи мазкурро тавассути саҳифаҳои худ таблиғу ташвиқ сохтанд.

Ёдовар мешавем, ки форуми ҷавонон дар мавзӯи “Дарёфти роҳҳо ва абзорҳои истифодаи шабакаҳои иҷтимоӣ ба манфиатҳои миллӣ ва тарғиби арзишҳои давлатдорию давлатсозӣ” бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Иттифоқи ҷавонони Тоҷикистон баргузор гардида истодааст.