Имрӯз дар доираи таҷлили 25-умин солгарди Истиқлолияти давлатии Ҷумҳурии Тоҷикистон дар ноҳияи Шаҳринав бинои Маркази ҷавонон ба истифода дода шуд.



Дар расми ифтитоҳи бино намояндагони Дастгоҳи иҷроияи Президенти Ҷумҳурии Тоҷикистон, роҳбарияти Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Мақомоти иҷроияи маҳаллии ҳокимияти давлатии ноҳияи Шаҳринав, фаъолону ҷавонон, сокинони касбу кори гуногуни ноҳия ва намояндагони ВАО иштирок намуданд.



Аҳтам Абдуллозода, раиси Кумитаи ҷавонон, варзиш ва сайёҳӣ дар суханрониаш қайд кард, ки дар зарфи 25 соли соҳибистиқлолии кишвар дастгирии давлату Ҳукумат дар татбиқи сиёсати давлатии ҷавонон ва варзиш хеле назаррас арзёбӣ гардида, дар ин самт пайваста барои ин қишри ҷомеа силсилаи тадбирҳо андешида мешаванд.

Раиси кумита ба фаъолият шуруъ намудани Маркази ҷавонон дар ноҳияи Шаҳринавро аз ғамхориву таваҷҷуҳи навбатии Пешвои миллат, Президенти Ҷумҳурии Тоҷикистон нисбат ба ҷавонон арзёбӣ намуд.



Сайфиддин Давлатзода, сардори Раёсати илму маърифати Дастгоҳи иҷроияи Президенти Ҷумҳурии Тоҷикистон аз номи Ҳукумати кишвар ҷавонон ва мардуми сарбаланди Шаҳринавро бо ин рӯзи нишот, ба фаъолият шуруъ намудани Маркази ҷавонон шодбош намуда, зикр намуданд, ки имрӯз нақши ҷавонон дар ҳаёти иҷтимоиву иқтисодии мамлакат назаррас буда, ин қишри ояндасоз нибат ба дигар қишри ҷомеа фаъолтаранд. Ҳамзамон қайд карда шуд, ки фаъолияти марказ барои ҷавонон барои худташаккулёбӣ, баланд бурдани малакаи касбиву корӣ, забономӯзӣ, воқиф будан аз технологияи муосир мусоидат менамояд.

Сипас, Нусратулло Аюбзода, раиси ноҳияи Шаҳринав баромад намуда, ҷавононро ба ҳифз ва эҳтиром намудани Ватани азиз ва муқаддасоти миллӣ талқин кард.



Бинои Маркази ҷавонони ноҳияи Шаҳринав иборат аз ду ошёна ва таҳхона буда, ба тамоми талаботи замони муосир ҷавобгӯ мебошад. Он ҷиҳати баланд бардоштани маърифати баланди фарҳангию сиёсӣ ва дар руҳияи созандагию бунёдкорӣ тарбия намудани наврасону ҷавонони ноҳия заминаи мусоид фароҳам меоварад.

Дар марказ бахшҳои технолигияи муосир, омӯзиши интерактивӣ, Бахши Иттифоқи ҷавонони Тоҷикистон, Маркази сайёҳӣ ва ҳунарҳои миллӣ, Бахши зебоипарастӣ, Бахши ҷавонон, варзиш ва сайёҳии ноҳия, Бахши маърифатӣ-фароғатӣ, Бахши ҳунаромӯзӣ, Бахши иттилоотӣ-таҳлилӣ, маркази маслиҳатҳои муфид ба ҷавонон, маркази хизматрасонии маишӣ-фароғатӣ амал карда, дар як вақт ба ҷавонон маҷмуи хизматрасониҳоро пешниҳод менамояд.



Бо мақсади баланд бардоштани маърифати фарҳангӣ ва зеҳнии ҷавонон, бурдани корҳои мақсаднок дар самти дастгирии фарҳангии онҳо, ташкили истироҳат, фароғат ва саёҳати ҷавонон, мусоидат намудан дар интихоби касб, баланд бардоштани савияи донишу малака, такмили ихтисос ва шуғлнокии ҷавонон, ҷалби онҳо ба забономӯзӣ ва курсҳои кӯтоҳмуддати касбомӯзӣ, баланд бардоштани ҳисси ватандӯстӣ ва худшиносию худогоҳии наврасону ҷавонон дар шаҳру ноҳияҳои ҷумҳурӣ чунин марказҳои ҷавонон таъсис дода шудаанд.



Шералӣ ҶАЛОЛОВ,
Cуратгир Т. ФОЗИЛОВ, “ҶТ”