Дар доираи баргузории Фестивали ҷумҳуриявии "Дӯстии ҷавонон" дар шаҳру ноҳияҳои тобеи марказ нахуст иштирокчиёни он ба ноҳияи Файзобод ташриф оварда, бо мавзеъҳои зебоманзар, дастовардҳо ва фаъолияти корхонаҳои истеҳсолии ноҳия шинос гардиданд.

Нахуст, меҳмонону ҷавонон дар даромадгоҳи ноҳияи Файзобод бо самимияти хосса истиқбол гирифта шуданд. Маросими пешвоз бо риояи анъанаҳои миллӣ, пешниҳоди нону намак, садои мусиқии идона ва фазои пур аз шодию фараҳ баргузор шуд.
Роҳбарияти ноҳияи Файзобод зимни истиқбол иштирокчиёни фестивалро ба диёри меҳмоннавоз ва зебоманзари Файзобод хайрамақдам гуфта, ҳамагонро ба муносибати Рӯзи Ваҳдати миллӣ самимона табрик намуд. Таъкид гардид, ки Ваҳдати миллӣ ҳамчун омили асосии сулҳу субот ва пешрафти кишвар барои ҳар як шаҳрванди Тоҷикистон арзиши бузург дорад.

Баъдан, иштирокчиёни фестивал аз Корхонаи оби Файзобод боздид намуда, бо фаъолияти он шинос шуданд. Ба ҷавонон иттилоъ дода шуд, ки корхона фаъолияти худро аз соли 2017 оғоз намуда, то имрӯз бо истифода аз имкониятҳои мавҷуда ва риояи талаботи муосир фаъолияти пурсамар дорад.

Ҷавонон аз раванди истеҳсолот, шароити корӣ ва фаъолияти кормандони корхона дидан намуда, бо таваҷҷуҳ ба дастовардҳои истеҳсолии он шинос шуданд.

Сипас, иштирокчиён аз осорхонаи таърихӣ - кишваршиносии ноҳияи мазкур боздид намуданд.

Ёдовар мешавем, ки Фестивали ҷумҳуриявии “Дӯстии ҷавонон” аз 25 то 30 июн бахшида ба 29- умин солгарди Ҷашни Ваҳдати миллӣ дар шаҳру ноҳияҳои Файзобод, Роғун, Нуробод, Рашт, Тоҷикобод ва Лахш баргузор мегардад. Он бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо мақомоти иҷроияи ҳокимияти давлатии шаҳру ноҳияҳои болозикр баргузор шуда истодааст.

М. МУҚАДАМОВА, “ҶТ”