ҶАВОНОН
Ҷумъа 20 Май 2022 09:32
2954
Сармояи хусусии Тревис Каланик, директори генералии Uber Technologies - Хадамоти фаврӣ оид ба даъвати таксиҳо, ки қариб дар тамоми кишварҳои олам, аз ҷумла дар Русия фаъолият менамояд, 3 миллиард долларро ташкил медиҳад. Ширкат бо мақсади беҳтарсозии хизматрасонии нақлиёт, сарфаи вақту сӯзишворӣ ва ҳамзамон тозагии муҳити зист таъсис дода шудааст.

“Ҷем-сейшен”

Сари мизи музокира 6 нафар ҷавонон нишастаанд. Онҳо ба асосгузор ва директори генералии Uber оид ба натиҷаҳои нахустини таҷриба, ки чанде пеш ба амал баровардаанд, маълумот медиҳанд. Он чизе, ки барои муштариён дар азнавсозии лоиҳа чун тағйироти начандон муҳим ба назар мерасад, дар асл ба болоравӣ, истифодаи он, муҳлати расондани мошинҳо, рейтингҳо ва ғайраҳо таъсир мерасонад. Тақрибан якуним соат ӯ ҳар як рақам, ҳар як ҷузъиёти масъаларо муҳокима мекунад, суол медиҳад ва далелу рақамҳоро месанҷад. Хеле метарсад, аз он ки мабодо муштарӣ аз кору фаъолити онҳо қаноатманд намешаваду як рӯзи дароз ӯ бо кайфияти ноҷур мегардад. Ин чорабиниро дар ширкат “ҷем-сейшен” меноманд, ки дар он ҳама мушкилот ошкор гардида, ба идея табдил меёбад, идея бошад, ба натиҷа ва натиҷа аз он нуқтаи назар таҳлил мегардад, ки он то куҷо ба самаранокии фаъолият таъсир гузошта метавонад.

“Шахси бесубот” ё “доҳии хашмгин”?

Маҷаллаи машҳури Forbes Тревис Каланикро дар рӯйхати ашхоси бонуфузтарини ҷаҳон ҷойгир намуд. Нафаре ӯро шахси “беору бесубот” меномаду нафари дигар “доҳии хашмгин”, сеюмин “якраву боисрор”-у чорумин “дӯсти беғараз”. Ҳар як аз ин лақабҳо дар худ ҳиссае аз ҳақиқат доранд, аммо ягонтои онҳо аниқ карда наметавонад, ки маҳз бо шарофати кадом хислату кадом қобилияти худ ин ҷавон тавонистааст, ки ширкати худро ҳамчун бонуфузтарин ширкати олам мураррифӣ намояд.

Роҳи ноҳамвор

Тревис Каланик ҳамеша ба қонуният мароқ зоҳир менамуд. Ҳанӯз замони наврасӣ ӯ ба ҳаракати нақлиёт дар шоҳроҳҳои Калифорнияи Ҷанубӣ аҳамият медод ва роҳҳои сохтани гузаргоҳҳои осонро дар онҳо тарҳрезӣ менамуд. Дар давраи таҳсил дар донишгоҳ ӯ ба барномаҳои компютерӣ ва таҳияи ҳар гуна лоиҳаҳо шавқ дошт. Чандин лоиҳаҳои таҳиянамудаи ӯ бебарор анҷом ёфт ва дар ин роҳ мушкилоти зиёде пешорӯи ӯ падид омад. Оқибат дар соли 2009 Каланик ҳамроҳи Гаррет Кэмп ширкати Uber-ро таъсис дод, ки дар заминаи он соли 2010 Хадамоти хизматрасонии таксиҳо ба кор шуруъ намуд. Нахуст ин ба назари Каланик ва дӯстонаш кори начандон мароқангезу даркорӣ намуд, аммо чанде пас ӯ дарк кард, ки чӣ гуна бо ёрии математика хизматрасонии таксиҳо метавонад тамоми низоми нақлиёти шаҳриро тағйир диҳад. Агар нархҳо арзон шаванд, ин боиси мароқ зоҳир намудани мусофирон ва ҳамзамон ронандаҳо гардида, вақти интизории нақлиёт кӯтоҳ мегардад, ки ин низ боиси қаноатмандии мусофирон ва зиёд гардидани даромади ронандаҳо мешавад.

Мутахассис оид ба мушкилот

Бо маҳорати хосса ошкор ва бартараф кардани камбудиҳо ин аз хислатҳои асосии Тревис маҳсуб меёбад. Ӯ худро “мутахассиси варзида оид ба мушкилоти Uber” номидааст. Вақте ӯ бо ҳаяҷони хосса доир ба фаъолияти худ қисса мекунад, дар чашмонаш шуълаи аҷибе медурахшад. Ӯ диди махсуси худро дорад. Тамоми саъю кӯшиши ӯ ба он равона гардидааст, ки бояд бе тарсу ҳарос Uber-ро аз роҳи пур аз монеаҳо гузаронад. “Ҳар як мушкилот тобишҳои аҷиби худро дорад ва онро маҳз имрӯз бояд ҳал кард, – мегӯяд Каланик. – Аммо ин як қисмати кори умумӣ мебошад. Ту ҳамзамон барои ҳалли мушкилоти ҳамгун дар оянда механизми ҷадидеро бунёд месозӣ ва танҳо баъди ин ба мушкили дигар мегузарӣ”.

Хизматрасониҳои ҷадид

Uber аллакай дар аксари шаҳрҳо ақидаи одамонро доир ба хизматрасонии нақлиёт тағйир додааст. Он сол то сол густариш ёфта, як қатор хизматрасониҳои ҷадидро ба оламиённ пешниҳод менамояд. Инҳо бурда расондани хӯрок (Eats), расондани фаврӣ (Rush), ҳамчунин ҳамлу нақл дар роҳҳои дур (Freight) мебошанд. Ширкат ният дорад, ки истифодаи чархболҳо, тайёраҳо ва киштиҳоро низ ба роҳ монад. Он барои рушди автомобилҳои бесарнишин, аз ҷумла автомобилҳои боркаш маблағҳои зиёде сарф намудааст. Он ҳатто ба таҳияи лоиҳаи автомобилҳои паррон машғул аст. Айни ҳол чанде аз лоиҳаҳои пешниҳодгардидаи ширкат, аз қабили Х (навъи хеле арзони таксиҳои хусусӣ), Pool (таксӣ бо ҳамсафар), Black и Select (таксиҳои элита ё баргузида) дар аксар кишварҳо мавриди истифода қарор доранд. Барои ҷалби ҳарчи бештари ронандаҳо ба хизматрасонӣ ва ба миён овардани рақобати солим миллионҳо сарф мегардад. Тибқи таҳлили Forbes хароҷоти ширкат дар соли 2016 2 миллиард долларро ташкил медод. Ин дар ҳолест, ки даромади он 5 миллиард доллар буд. “Аз он ки имрӯз даромад ба даст биёрӣ, беҳтар аст, ки пагоҳ дар бозор бартариятро соҳиб бошӣ”, – мегӯяд Тревис. Имрӯз ин ширкат ба рушди яке аз соҳаҳои бузургтарини сайёра - саноати автомобилӣ таъсири худро гузоштааст.

Натиҷаҳо

Аллакай дар нимсолаи дуюми соли 2016 даромади ширкат ба андозаи 1 миллиард $ зиёд ва шумораи кормандон зиёда аз 9000 нафарро ташкил медод. Хизматрасонии Uber барои зиёда аз 450 шаҳри 73 кишвари олам дастрас гардид. Ҳар моҳ аз ин хизматрасонӣ зиёда аз 40 миллион нафар истифода менамояд. Forbes моликияти Каланикро 6,3 миллиард доллар баҳогузорӣ намуд ва айни ҳол мақсади ягонаи Каланик ҳамин аст, ки нақлиётро мисли об ба ҳамагон дастрас гардонад.

Усули кори Uber

Кори Uber бо содагии худ фарқкунанда аст. Тугмаро зер мекунӣ ва мошин меояд. Барои дар сатҳи зарурӣ ба роҳ мондани ин хизматрасонӣ бояд рамзҳои барномавии ширкат ба таври идеалӣ кор кунанд. Тарзи кори он чӣ гуна аст? Тугмаро пахш мекунӣ ва маҳалли будубоши ту дар серверҳои Uber равшан намудор мешавад, дар онҳо боз макони будубоши тамоми мошинҳои бо хизматрасонӣ ҳамкоридоштаро низ мушоҳида кардан мумкин аст. Ҷои онҳо баъди ҳар якчанд сония нав карда мешавад, ки ин ҳисобу китоби доимиро тақозо мекунад. Вақте ронанда мусофирро мегирад, маҳалли таъинот ва самти ҳаракати он нишона гузошта мешавад ва барнома ронандаро ба маҳалли зарурӣ меорад ва аллакай барояш мусофири навбатиро ҷустуҷӯ мекунад.

Кор дар хизматрасонии Pool каме мураккабтар аст. Ба хотири паст кардани арзиши роҳкиро барои мусофир ва баланд бардоштани музди ронанда система ҳамсафар меҷӯяд ва ин набояд вақти зиёдро гирад. Ин ҷо таҳлили вазъи роҳҳо лозим аст. Ғайр аз ин, муҳим он аст, ки мусофири дуюмро ба ақиб нагашта савор намоӣ, то боиси норозигии мусофири аввала нашавад. Рамзи барномавӣ барои мураттабии кор ҷавобгӯ мебошад.

“Худро ҳамеша 15-сола эҳсос мекунам”

Тревис, ки айни ҳол 40 сол дорад, ба суоли “Дар ҳоле ки корҳоят хубанд, шумо худро чӣ гуна эҳсос мекунед?”, чунин посух мегӯяд: “Маро ҳамеша мушкил ва ноҳамвориҳо ба худ ҷалб месозанд, ман ҷое ором буда наметавонам ва ҳамеша он эҳсосе маро фарогир аст, ки 15 сол қабл буд”.

Тавре яке аз ҳамкорони Тревис мегӯяд, ӯ хеле исроркор асту то муродаш ҳосил нашавад, аз роҳаш намегардад. Боре ӯ дар хонаи яке аз кормандони ширкати Google 9 соат вақти худро сарф намуд, то ӯро ба Uber ҷалб намояд. Журналистонро дӯст намедорад, чунки онҳо ба кораш халал мерасонанд. Худро шахси беилтифот ва сарфакор меҳисобад. Баҳс карданро хеле дӯст медорад.

Шаҳло ЭШОНОВА, “ҶТ”

Эзоҳи худро нависед



Рамзҳо дар расм

Рӯзнома

Назарсанҷӣ

У вас нет прав на участие в данном опросе.

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Декабр 2021 c.