Раиси ноҳияи Мурғоб Мурзабай Ҷошбаев ва мудири Бахши кор бо ҷавонон ва варзиши ноҳия Жанпулод Қамчибеков бо сокинон ва ҷавонони ҷамоати деҳоти Рангкул мулоқот намуданд.

Зимни вохӯрӣ масоили бунёди майдончаи варзишии замонавӣ, рӯ овардани сокинон ба солимиву сиҳатӣ, истеъмоли маҳсулоту озуқавории хушсифат, ҷалби бештари ҷавонон ба созандагиву бунёдкорӣ, рушди сайёҳиву ҳунарҳои мардумӣ мавриди баррасӣ қарор гирифт.

Аз ҷониби бахш ба падару модаре, ки фарзандонашон ихтиёрӣ ба хизмати ҳарбӣ рафтаанд, сипосномаҳо тақдим шуд. Қайд гардид, ки таи чанд сол аз ҷамоати мазкур сафи ихтиёриён зиёд шуда истодааст. Ин хизмати шоистаи волидоне ҳаст, ки фарзандони худро дар рӯҳияи худшиносиву ватанпарварӣ тарбия кардаанд.

Дар фарҷом бо иштироки дастпарварони мактаби санъат ва мусиқии ҷамоат беҳтарин барномаи фарҳангӣ бо созу наво, рақсу намоиши саҳнавӣ пешкаши ҳозирин гашт.