ҶАВОНОН
Якшанбе 21 Июл 2019 04:04
5668
Имсол дар озмуни “Авто-Бону-2019”, ки ҳамасола бо ташаббуси Вазорати корҳои дохилии ҷумҳурӣ ва Раёсати БДА ВКД гузаронида мешавад, Муътабар Азимова аз вилояти Суғд сазовори ҷойи аввал ва соҳиби мукофоти асосӣ – диплом ва рамзи озмуни мазкур гардид.

Наргисой Туйчиева, полковники милитсия, сардори Шуъбаи тарғибот ва ташвиқоти Раёсати Бозрасии давлатии автомобилии ВКД дар суҳбат иброз намуд, мақсади асосии гузаронидани озмун баланд гардидани мавқеи зан дар ҷомеа мебошад. Ӯ гуфт:“Бо дастгирии бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавқеи зан-модар дар даврони соҳибистиқлолӣ боз ҳам баланд гардидааст. Дар ин радиф Раёсати БДА ВКД бо иштироки бонувони ронанда ба ифтихори ҷашни Наврӯзи оламафрӯз ва “Солҳои рушди деҳот, сайёҳӣ ва ҳунарҳои мардумӣ” озмуни навбатии маҳорати касбӣ байни занону духтарони ронанда “Авто – Бону-2019”-ро гузаронд”.

Озмуни мазкур дар автодроми автоматонидашудаи ба номи А.Турсунов, воқеъ дар километри 7-уми кӯчаи С.Айнии шаҳри Душанбе баргузор шуда, дар он бонувони ронанда миёни ҳам барои ба даст овардани мақоми ифтихорӣ талош намуданд ва дар натиҷа Муътабар Азимова ғолиби озмун гардид.
  
“Озмун дар панҷ давр - “Ман ва автомобилам” (муаррифӣ ва ороиши автомобил), “Донандагони қоидаҳои ҳаракат дар роҳ”, “Рондани автомобил дар Автодром”, “Шарҳи қисмҳои автомобил” ва “Намоиши ҳунарҳои мардумӣ” гузаронида шуда, дар он 50 бонуи тоҷик иштирок намуда, маҳорати худро нишон доданд. Хеле хушбахтам, ки дар озмун ғолиб гардидаму мақоми ифтихориро соҳиб шудам”, - бо хушнудӣ иброз дошт Муътабар Азимова.
   
Муътабар Азимова, дар боробари модар будан, боз дар беморхонаи вилояти Суғд ба ҳайси дастурдиҳандаи шуъбаи офият кор мекунад. Аз соли 2000 инҷониб соҳиби ҳуҷҷати ронандагӣ аст ва ҳамеша ҷои кор бо мошини шахсӣ меравад. Ҳар субҳ сари чамбараки мошин менишинаду орому эҳтиёткорона ба роҳ мебарорад, фарзандонашро ба мактабу боғча гусел намуда, баъдан ба ҷойи кори хеш меравад. 
 
Аз таҳлилҳои коршиносони соҳа бармеояд, ки бонувон зимни идора намудани мошин нисбат ба мардон боэҳтиёт буда, талаботи қоидаҳои ҳаракати роҳро дар ҳама ҳолат риоя менамоянд. 

“Соли дуюм аст, ки дар ин озмун иштирок мекунам. Соли гузашта ҷои дувумро ишғол намуда, рӯҳафтода нашудам. Чунки ман аз ин озмун барои худ боз як манфиати дигаре гирифтам. Рондани мошин ва ё малакаи касбии ронандагӣ барои ман баъди гузаронидани  озмуни мазкур боз ҳам бештар гардид. Имсол вақте ки аз тарафи ҳайати ҳакамони озмун ғолибро эълон карданд, дар ҷойи якум номамро дида, хеле хурсанд шудам”, - гуфт Муътабар Азимова.
  
Ёдовар мешавем, соли панҷум аст, ки озмуни мазкур доир гардида, ҳадаф аз он баланд бардоштани малакаи касбии занони ронанда, таблиғи қоидаҳои ҳаракат дар роҳ ва пешгирии садаманокӣ мебошад. 


Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31 1 2 3 4

Июл 2019 c.