Имрӯз, 4-уми октябр, бахшида ба “Соли ҷавонон” ва Рӯзи забони давлатӣ бо ибтикори Кумитаи кор бо ҷавонон ва варзиши назди Ҳукумати ҷумҳурӣ дар Мактаби байналмилалии президентӣ, воқеъ дар шаҳри Душанбе, нахустин ҳамоиши ғолибони олимпиадаҳои ҷумҳуриявию байналмилалӣ таҳти унвони “Саҳми Пешвои миллат дар ҳифз ва гиромидошти забони тоҷикӣ ҳамчун сарвати бебаҳои миллат ва давлат” баргузор гардид.

Дар ҳамоиши мазкур намояндагон аз Кумитаи кор бо ҷавонон ва варзиш, Вазорати маориф ва илм ва Кумитаи забон ва истилоҳот иштирок ва суханронӣ намуданд.

Аҳтам Абдуллозода, раиси Кумитаи кор бо ҷавонон ва варзиш зимни баромади хеш таъкид намуд, ки “Ҳамоиши мазкур бо роҳнамоиву ҳидоятҳои Пешвои миллат ба хотири дастгирӣ, ҳавасмандгардонӣ, қавигардонии дӯстии ҷавонони минтақаҳо ва ба ин васила пайдо намудани истеъдодҳо ва рушд додани онҳо аз иқдомоти арзанда дар роҳи муаррифии ҷавонону наврасони донишманд, муҳассилини болаёқати муассисаҳои таълимии кишварамон арзёбӣ мегардад. Ҳамоиши имрӯза таҳти унвони “Саҳми Пешвои миллат дар ҳифз ва гиромидошти забони тоҷикӣ ҳамчун сарвати бебаҳои миллат ва давлат” бахшида ба Рӯзи забони давлатӣ доир шуда истодааст. Маҳз бо талошҳои пайвастаи Пешвои миллат муносибат ва ғамхориҳо нисбат ба забони тоҷикӣ, ҳифзи асолату гиромидошту тозагии ин муқаддасоти давлатӣ боис гардид, ки имрӯз забони тоҷикӣ ҳамчун далели арҷгузорӣ ба фарҳанги миллӣ эътироф гардидааст”.

Дар чорабинӣ беш аз 300 нафар хонандагони фаъол ва донишҷӯёне, ки дар озмуну олимпиадаҳои мухталифи фаннӣ дар дохил ва хориҷи кишвар ҷойҳои намоёнро соҳиб шудаанд, иштирок ва суханронӣ намуданд.

Меҳмонон зимни баромади хеш бобати дастгирӣ, ғамхорӣ ва таваҷҷуҳи пайвастаи Пешвои миллат нисбати насли наврас дар ҷодаи илмомӯзӣ суханронӣ намуда, таъкид гардид, ки бояд ҳар як насли наврас ва ҷавони кишвар имрӯз паи омӯхтани илму дониш бошаду бо аз бар намудани касбу ҳунарҳои гуногун дар оянда саҳми арзандаи хешро дар рушди кишвар гузорад.

Дар интиҳои чорабинӣ муроҷиатномаи ғолибони олимпиадаҳои ҷумҳуриявӣ ва байналмилалӣ қабул гардида, сипас аз ҷониби ҷавонон ва наврасони фаъоли шаҳри Душанбе барномаи хуби фарҳангӣ пешкаши ҳозирин гардонида шуд.

Беҳрӯз ХОЛМУРОДОВ, “ҶТ”