11 март дар спорт – бар “Истиқлол” бо ташаббуси КВД “Клуби соҳибкорони ҷавон” – и Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон нахустин бизнес – конекти соҳибкорони Тоҷикистону Чин баргузор гардид.

Дар чорабинии мазкур роҳбарияти клуб, соҳибкорону тоҷирон, намояндагони ширкатҳои бонуфузи Тоҷикистон ва Чин иштирок намданд.

Дилшод Ҷураев, директори Клуби соҳибкорони ҷавон  ҳозиринро ба  25-солагии муносиботи дипломатии Тоҷикистону Чин шодбош гуфта, ташаббуси баргузории бизнес-конектро дар Соли ҷавонон, ки аз ҷониби Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмон эълон гардидааст, як қадами устувор баҳри рушди соҳибкорӣ миёни ҷавонони тоҷик унвон кард.

Ҳамчунин дар чорабинии мазкур Илҳом Маҳкамбоев, мушовири Шӯрои машваратӣ оид ба беҳтар намудани фазои сармоягузории назди Президенти Ҷумҳурии Тоҷикиситон, имкониятҳои сармоягузорӣ дар Тоҷикистонро муаррифи намуда, дар хусуси имтиёзҳои пешбинишуда ба сармоягузорони хориҷӣ маълумоти муфид пешниҳод кард.

Дар ин миён, ширкати миллии «55 Group» бо ҶДММ «Вера», ки соҳибкорони чинӣ онро роҳбарӣ мекунанд, ёддошти ҳусни тафоҳум ҷиҳати ҳамкориҳои минбаъда ба тасвиб расониданд.

Ҳамчунин намояндаи ширкати чинии “ИЖУЙ” – тиҷорати байналмилалии электронӣ оид ба хариду фурӯши маҳсулот тариқи сомонаи худ маълумоти ҷолиби диққатро пешниҳод намуд.

Дар охири чорабинӣ муколамаи озод байни иштирокчиён баргузор гардид, ки барои шиносоӣ ва минбаъд ба роҳ мондани ҳамкориҳои судманд баҳри амалисозии лоиҳаҳои муштаракӣ инвеститсионӣ хеле муҳим хоҳад буд.

Шералӣ АЗИМӢ, "ҶТ"