ҶАВОНОН
Ҷумъа 03 Июл 2020 08:57
7065
Ҷомеаи муосир ва суръати рушди равандҳои сиёсию иҷтимоӣ ва иқтисодӣ тақозо менамоянд, ки муносибатҳои комилан нави идоракунӣ амалӣ карда шаванд. Зеро суръати баланди рушди муносибатҳои ҷамъиятӣ, имкониятҳои техникию технологӣ ва иттилоотӣ фаъолияти идоракуниро ба механизме табдил додааст, ки андешидани чораҳои фаврӣ рукни таркибии он мебошад. Вобаста ба ин, вокуниши саривақтӣ ба ҳама эҳтиёҷоти пайдошавандаи шаҳрвандон, саривақт ошкор ва қонеъ намудани онҳо, андешидани чораҳои пешгирӣ ҷиҳати роҳ надодан ба таъхир дар анҷоми онҳо амалҳое мебошанд, ки эътимоди ҷомеаро ба роҳбар зиёд намуда, баҳри ҳамгироии ҳама қишрҳои ҷомеа мусоидат мекунад.

Махсусан, ҳамин шабу рӯзе, ки ҷомеаи ҷаҳониро паҳншавии бемории фарогири COVID -19 ба ташвишу таҳлука андохта, мушкилиҳои зиёди иқтисодию иҷтимоиро пеш овардааст, вокуниши фаврии роҳбар нишонаи огоҳии комили ӯ аз вазъи мавҷуда мебошад. Дар таҷрибаи ҳамарӯзаи шаҳрдории пойтахт ин ҷанбаъ амиқ эҳсос карда мешавад, ки боиси ифтихормандии кулли сокинон, пеш аз ҳама, ҷавонон мебошад. Аз рӯзе, ки ҳодисаи сирояти беморӣ дар қаламрави кишвар расман эълон гардид, роҳбарияти шаҳр тамоми қудрату нерумандии худро барои рафъи мушкилоти бамиёномада равона карда, собит намуд, ки ягонагиву ваҳдат ва таҳаммулпазирӣ кулли душвориҳоро паси сар хоҳад кард.

Тӯли 15 рӯз дар ҳудуди майдони варзишии “Бофанда” – и пойтахт беморхонаи муваққатӣ бо хонаҳои сайёр барои 1000 нафар ва дар маҷмӯаи варзишии “Манеж” барои 350 нафар бо тамоми таҷҳизоти замонавӣ омода карда шуд. Новобаста аз шароити мушкили иқтисодӣ, ки бемории ҳамагири сироятӣ ба бор овард, барои ҳифзи сиҳатии сокинон як қатор хобгоҳҳои донишгоҳҳои ҳудуди шаҳр, аз ҷумла, хобгоҳи Донишгоҳи миллии Тоҷикистон ба беморхонаи муваққатӣ табдил дода шуд, ки аз 12 ошёна ва таҳхона иборат буда, дар он 650 кати хоб барои қабул ва табобати шахсони мубталои бемории нави сироятӣ ҷой дода мешаванд. Дар маҷмӯъ, бо ибтикори Раиси шаҳри Душанбе муҳтарам Рустами Эмомалӣ дар пойтахт беморхонаҳои муваққатӣ муҷаҳҳаз бо тамоми лавозимоти тиббии муосир барои қабули беш аз 3000 беморон омода гардид. Мавриди зикр аст, ки дар ҳудуди шаҳр беш аз 30 беморхона бо 5284 кат ва беш аз 5390 нафар табиб ва кормандони соҳаи тиб ба беморони гирифтори COVID-19 хизмат расонида, дар ҳамаи тадбирҳои зикргардида саҳми Раиси шаҳри Душанбе муҳтарам Рустами Эмомалӣ беназир аст.

Ҳамзамон, набояд фаромӯш кард, ки дар баробари чунин ибтикороти инсондӯстона, дар ин давра аз ҷониби Мақомоти иҷроияи ҳокимияти давлатии шаҳри Душанбе буҳрони сирояти умумишаҳрӣ идораву пешгирӣ гардида, дар ҳошияи супоришҳои саривақтии Раиси шаҳр сокинони пойтахт ором ва ҷомеа ба сӯи ободкорӣ раҳнамоӣ карда шуд.

Руйдоди дигаре, ки эътимоди моро ба ҷавонмардӣ ва дардошноии Раиси шаҳри Душанбе муҳтарам Рустами Эмомалӣ зиёд намуд, ин вокуниши фавриашон ба муроҷиатномаи саҳмдорони маҳаллаи 83 – и пойтахт буд, ки аз бесалоҳиятии баъзе аз ширкатҳои сохтмонӣ бо гузашти вақти муайян натавонистанд, соҳиби хона шаванд. Ин муроҷиат, ки тариқи шабакаҳои иҷтимоӣ паҳн гардид, аз ҷониби шаҳрдорӣ фавран баррасӣ карда шуда, дар ин самт комиссияи дахлдор ва сохторҳои марбутаи шаҳр муваззаф гардидаанд, ки дар муҳлати як сол сохтмони бинои истиқоматӣ ба итмом расонида шуда, сокинон бо хонаҳои истиқоматӣ таъмин карда шаванд.

Бояд қайд намуд, ки ин амали раиси ҷавони шаҳри Душанбе нишонаи камолоти инсонии ӯст, ки тавонист дарду мушкилоти мардумро эҳсос намуда, ҷиҳати рафъи он масъулонро вазифадор намояд. Оре, ҷиддӣ ва қотеона вазифадор намудани масъулин баҳри ҳалли мушкилоти мардум яке аз нишонаҳои роҳбари муваффақ аст, ки метавонад талаботи рӯзафзуни аҳолӣ ва ҷомеаро қонеъ ва адолатро мустаҳкам намояд.

Сабақи роҳбарӣ ва сарварие, ки Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ аз мактаби сарварии Пешвои муаззами миллат муҳтарам Эмомалӣ Раҳмон бардоштаанд, ҷавҳарашро футувват ва инсонгароӣ ташкил дода, хоксорӣ, ҷасоратмандӣ ва масъулиятшиносӣ хислатҳое мебошанд, ки баҳри иҷрои рисолати сарварию роҳбариашон мусоидати ҳамаҷониба менамоянд.

Ин ҳама садоқату меҳанпарастӣ боиси сарфарозии кулли ҷавонони шаҳр гардидааст. Зеро маҳз ҷавонон дили гарм доранду печидагиҳову роҳи нишебу фарозро дарк намуда, ҳамеша дар ҷустуҷӯву такопӯянд, ба пеш менигаранду пеш мераванд.

Дар ин раванд, аз номи ҷавонону варзишгарони саодатманди пойтахти маҳбубамон – шаҳри Душанбе ба Раиси шаҳри Душанбе муҳтарам Рустами Эмомалӣ барои ташаббусҳои софдилонаву инсондӯстона ва хизматҳои шоиста дар роҳи таъмини зиндагии арзандаи сокинони пойтахт минатдории самимӣ ва дилгармиву ҷонибдории хешро изҳор менамоем.

Ман ҳамчун як фарди ҷавон аз хизматҳои содиқонаву ҷавонмардонаи Раиси ҷавони пойтахт дарси матонату ҷавонмардӣ ва нексириштиву адолатпарвариро омӯхта, якҷо бо ҷавонон ва варзишгарони ба ору номусу Ватан дар пайравӣ аз иқдомҳои наҷибу созандаи Пешвои муаззами миллат муҳтарам Эмомалӣ Раҳмон ва Раиси шаҳри Душанбе Рустами Эмомалӣ дар амалисозии ҳадафҳои рушди устувор хизмати содиқона, бунёдкорона ва созанда баҳри таъмини суботи ҷомеа, рушди бемайлони соҳаҳои иҷтимоию иқтисодӣ, фарҳангиву сиёсӣ ва саодату осудагии кишвар махсусан, пойтахти азизамон шаҳри Душанбе софдилона хизмати шоиста менамоем.

Шоҳзод РАҲИМЗОДА,
сардори Раёсати кор бо ҷавонон ва варзиши шаҳри Душанбе

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
29 30 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2

Июл 2020 c.