Муассисаи давлатии "Тоҷикфилм" филмеро омода карда истодааст, ки фазои кории Неругоҳи барқи обии "Роғун"- ро фаро мегирад.

Дар ин бора Маҳмадсаид Шоҳиён директори муассиса зимни нишасти хабарӣ иттилоъ дода гуфт, ки филми ҳунарӣ буда, "Ошёни нур" унвон дорад.

Филм бо коргардонии Муҳаммадрабии Исмоил омода шуда, ҳадафаш инъикоси амалӣ намудани лоиҳаҳои бузурги стратегии дорои аҳамияти сарнавиштсоз, аз ҷумла сохтмони Неругоҳи барқи обии "Роғун" мебошад.

- Ин филм аз ишқи ду ҷавоне, ки ҳангоми кор дар ин неругоҳ бо ҳам ошно шудаанд, қисса мекунад, ки онҳо бо ба кор даромадани Агрегати севуми Неругоҳи барқи обии "Роғун" оиладор шуда, "Ошёни нур" месозанд- гуфт директори "Тоҷикфилм".

Ба гуфтаи Маҳмадсаид Шоҳиён филми "Ошёни нур" дар моҳи март дар арафаи ҷашни Наврӯз пешниҳод хоҳад шуд.

Сайёраи ҚИЁМИДДИН, "ҶТ"