Ҷавонони саодатманди диёр,

Пайравони асили Пешвои муаззами миллат,

Волонтёрони гиромӣ!

Бо як ҷаҳон эҳтирому муҳаббат ва ифтихору сарбаландӣ ҳамаи шумо ва дар симои шумо кулли ихтиёриён - волонтёрони кишварро бахшида ба “Рӯзи байналмилалии волонтёрон” табрику таҳният гуфта, ба ҳар яки шумо саломативу хушбахтӣ, комгориву комронӣ, эҳсоси баланди ватандӯстӣ ва музаффарияту сарбаландӣ таманно менамоям.

Волонтёрӣ василаи хуби муттаҳидсозии насли ҷавон буда, мактаби бузургест дар масири бакамолрасонии ҷавонон.
Воқеан, фаъолияти волонтёрӣ ба шахси комил шудани шумо – ҷавонон, яъне тарғибкунандагони некию хайрхоҳӣ мусоидат намуда, ҳамчун инсони башардӯст ба камол мерасонад.

Таҷлили Рӯзи байналмилалии волонтёрон дар Тоҷикистони соҳибистиқлол далели таваҷҷуҳи Ҳукумати кишвар, бахусус Президенти Ҷумҳурии Тоҷикистон, муҳтарам Эмомалӣ Раҳмон нисбат ба шумо ва фаъолияти содиқонаву фидокоронаатон мебошад.

Боиси ифтихору фараҳмандист, ки имрӯз аз нигоҳи ҷойгоҳ ва мавқеъ волонтёрон дар даврони соҳибистиқлолии кишвар мақоми хосса касб намуда, дар татбиқи сиёсати ватандӯстонаи Пешвои муаззами миллат саҳми боарзиш мегузоранд ва ташаббусҳои созандаро дар мамлакат роҳандозӣ менамоянд.

Муттаҳид ва сарҷамъ будани волонтёрон дар доираи мақсадҳои хайрхоҳона, кӯмакрасонӣ, ҳамоҳангсозӣ, мусоидат ба ҳалли мушкилиҳои гуногун лоиқи аҳсану дастгирӣ мебошад.

Шиоре, ки мову шумо пеша кардааем, дар худ масъулияти бузургеро доро мебошад. Зеро пайравӣ аз Пешвои миллат моро водор менамояд, ки ҳамеша ҳушёру зирак бошем, бар зидди тамоми омилҳои номатлуб ва фаъолияти қувваҳои носолими ҷомеа мубориза барем, дар замири худ ватандориро нисбати гиромидошти арзишҳои миллӣ парварем, дили ғамхор дошта бошем ва ҳамеша барои дареғ надоштани нерӯи инсонии худ ҷиҳати дастгирии ниёзмандон ва пешрафти Тоҷикистони азизамон саҳмгузор бошем.

Назару интизориҳои Ҳукумати ҷумҳурӣ аз ҷавонон бисёр нек арзёбӣ гардида, барои тақвияти сиёсати давлатӣ дар ин самт, ҳавасмандгардонӣ ва дастгирии ин қишри аз лиҳози ҷисмонию зеҳнӣ тавонманди ҷомеа ҳамарӯза тадбирҳои амалӣ роҳандозӣ карда мешавад.

Агар ба мафҳуми фаъолияти волонтёрӣ диққат диҳем, волонтёрӣ ин фаъолияти дар шакли бемузд иҷро кардани кор ва хизматрасонии берун аз вақти кор ва ё таҳсил ба ҳисоб рафта, ба ҳалли мушкилоти иҷтимоӣ дар соҳаҳои маориф, тандурустӣ, фарҳанг, дастгирии иҷтимоӣ ва хизматрасонии иҷтимоӣ нисбат ба аҳолӣ, тарбияи ҷисмонӣ ва варзиш, ҳифзи муҳити зист, пешгирӣ ва рафъи оқибатҳои ҳолатҳои фавқулодда ва таъмини амнияти шаҳрвандон равона карда шудааст.

Дар Тоҷикистон, ки 70 фисади аҳолии онро ҷавонон ташкил медиҳанд, татбиқи ин механизм тадбири саривақтист. Дар раванди ҷаҳонгароӣ муносибат ва рафтори мо нисбат ба насли ҷавон бояд махсус бошад. Чи хеле, ки маълум аст, имрӯз яке аз чунин муносибатҳо, ки рушди ҳаматарафаи ҷавонон ва истифодаи иқтидори онҳоро таъмин менамояд, ин ҳаракати ихтиёрӣ мебошад, ки чӣ аз лиҳози иқтисодӣ ва чӣ аз лиҳози иҷтимоӣ барои ҷамъият манфиатнок ва дастрас маҳсуб меёбад.
Бояд қайд намуд, ки фаъолияти волонтёрӣ ин майдони оғози рушди касбияти ҷавонон аст, ки робитаи ҷамъиятиашонро тавсеа медиҳад.

Бо мақсади дастгирӣ ва муттаҳидсозиву ҳавасмандгардонии волонтёрон дар назди Кумитаи кор бо ҷавонон ва варзиши назди Ҳукумати Ҷумҳурии Тоҷикистон Ташкилоти ҷамъиятии “Пайравони Пешвои миллат” фаъолият менамояд, ки мунтазам иқдомҳои нав дар самти ба омӯзиш ҷалб намудани ихтиёриёни ҷавон, рушди малакаи зеҳнӣ ва ҷиҳати такмили касбияти онҳо тадбирҳои муасирро рӯи кор меорад.

Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо мақсади ҷоннок намудани фаъолияти волонтёрӣ, фаъол намудани онҳо дар самти анҷом додани корҳои ихтиёрии ҷамъиятӣ, ҳамзамон амалӣ гардидани иқдомҳои созандаи Пешвои миллат, муҳтарам Эмомалӣ Раҳмон вобаста ба озмунҳои ҷумҳуриявии “Илм фурӯғи маърифат”, “Тоҷикистон Ватани азизи ман” ва “Фуруғи субҳи доноӣ китоб аст”, маҳфилҳои доимоамалкунандаро аз қабили “Маҳфили омӯзишии Пайравони Пешвои миллат”, “Илм – фурӯғи маърифат”, “Фурӯғи субҳи доноӣ китоб аст”, “Роҳбалад”, “Ҳуқуқшиносони ҷавон”, “Соҳибкасб”, “Тоҷикон дар оинаи таърих”, “Сиёсатшиносони ҷавон”, “Соҳибкорони ҷавон”, “Технологони ҷавон” ва маҳфили “Стипендиатҳои ҷавон” – ро таъсис додааст, ки дар доираи маҳфилҳои мазкур ҷавонони лаёқатманд ва волонтёрон ҷалб карда шуда, мунтазам чорабиниҳои маърифатию омӯзишӣ ва фарҳангию фароғатиро доир менамояд.

Ҷавононе, ки имрӯз фаъолияти волонтёрӣ доранд, метавонанд худро дар дилхоҳ самт санҷишу озмоиш намоянд. Ин навъи фаъолият барои бештари ҷавонон баҳри такмилу ташаккул имконоти мусоидро фароҳам овард. Боиси хушнудӣ ҳам ҳаст, ки волонтёрони мо дар баробари хизмати содиқона ба ҷомеаву халқ истеъдодҳои худро нишон дода, Тоҷикистонро дар миқёси ҷаҳон муаррифӣ менамоянд. Гузашта аз ин, нафароне, ки аз ин мактаби бузург гузаштаанд, имрӯзҳо бо донишу малака ва таҷрибаи аз худ карда дар вазифаҳои гуногуни хизмати давлатӣ аз рӯи касбу кори мухталиф фаъолият доранд.

Лозим ба ёдоварист, ки хайрхоҳӣ, амали нек кардан ё ҳаракати волонтёрӣ дар замони муосир чизи нав нест. Зеро миллати тамаддунофари тоҷик аз қадим ҳамеша бо роҳи ҳашар ва дар якҷоягӣ баҳри ободии деҳу дастгирии шахсони ниёзманду барҷомонда дасти ёрӣ дароз мекарданд. Моро мебояд дар пайравӣ аз гузаштагони соҳибтамаддуни худ ин хайрхоҳиро, ки дар замони муосир бо шаклҳои нав зуҳур кардааст, пайгир бошем ва давомдиҳандаи корҳои неки аҷдодони худ гардем.

Ман бовар дорам, ки Шумо ҷавони содиқи кишвар аз уҳдаи иҷрои ҳамаи вазифаҳои дар наздатон гузошташуда сарбаландона мебароед ва минбаъд низ кӯшиш мекунед, ки ба нафъи давлату ҷомеа боз ҳам содиқона хизмат намоед. Зеро шумо дар иҷрои ҳамаи кору масъулият новобаста аз душвориҳои шароити ҷаҳонишавӣ ва таъсири дигар омилҳои беруна, қодиру тавоноед.

Шумо – ҳамчун волонтёрони ташаббускору навовар метавонед, бо кору пайкори намунавӣ, арҷ гузоштан ба анъанаҳои миллию суннатӣ, ҳурмати калонсолон, бахусус падару модар, эҳтиром ба рамзҳои давлатӣ ва муқаддасоти миллӣ, дӯстию рафоқат, ору номуси ватандорӣ ва ҳисси меҳанпарастиро дар ниҳоди ҳамсолону ҳамкасбони худ талқин намоед. Ба унвони номи пуршарафи волонтёрӣ ва пайравони Пешвои миллат содиқ монед ва ин шиор, бояд шиори зиндагии ҳар яки шумо бошад.

Ҳамеша сарбаланду комгор ва ҳамқадами замон бошед!

Мо бо ҳар яки шумо ифтихор мекунем!

Рӯзи байналмилалии волонтёрон ҳумоюн бод!