Дар ҳаёт меҳри волидонро ба фарзанд ҳаргиз касони дигар дода наметавонанд. Зеро он меҳр пайванди хунӣ буда, ба фарзандон эҳсоси ногӯфтанӣ мебахшад. Бисёр фазилатҳост, ки онҳоро ба ҷуз падару модар ягон нафари дигар дар ҳаёт доро буда наметавонад. Аммо...

Инро ҳам бояд донист, ки дарахт бо обу инсон бо меҳр месабзад. Фарзанди одам ҳамеша ба дилгармӣ ва ба меҳру муҳаббати самимӣ ниёз дорад. Бахусус, дар ҳоле, ки як нафар ятим мемонад, бештар ниёзманди он мешавад. Ва аз ин дида эҳсоси хуштар нест, вақте ки инсон як ятимро хурсанду хандон месозад. Зеро ятимон дар зиндагӣ афсурдаву дилозурда, ниҳоят нозуктабъ ва бештар аз ҳама ба пуштибонию муҳаббат ниёз доранд. Бузургону гузаштагони мо баҳри дилсӯзии ятимон ва дасти сахо дароз намудан ба онҳо панду андарзҳои бешумор ба ояндагон боқӣ гузоштаанд. Шайх Аттор барҳақ фармудааст:

Ҳар кӣ хандонад ятими хастаро,
Боз ёбад ҷаннати дарбастаро.

Аз рисолати инсонист, ки агар ятимеро дар ҳолати нороҳатӣ ва афсурдагӣ бинад, ӯро хурсанд ва эҳсоси бекасиву ятимиро аз ӯ дур кунад. Гузаштагони мо дар ҳузури ятимон ҳатто сила кардани сари фарзанди хешро нораво донистаанд. Ятим будану набудан ба хости худи кас вобаста нест. Балки он амри тақдир ва қисмат мебошад. Ҳамин аст, ки дар тамоми гӯшаву канори дунё гурӯҳе аз аҳолиро ятимон ва бепарасторон ташкил медиҳанд. Аммо нуктаи аз ҳама муҳим ин аст, ки дар ҳар куҷо аз онҳо ба таври гуногун ҳимоя ва нигоҳубин мекунанд.

Дар кишвари мо 46 200 нафар ятим ба қайд гирифта шудааст. Барои нигоҳубини онҳо дар тамоми манотиқи кишвар 77 ятимхонаҳо бунёд гардидааст. Дар ин ятимхонаҳо ятимон дар беҳтарин шароит бо меҳру муҳаббати бузург нигоҳубин шуда, аз афсурдагиву ғам дар каноранд. Маҳз сиёсати ятимпарваронаи Пешвои миллат, муҳтарам Эмомалӣ Раҳмон намегузорад, ки онҳо заррае дарди бекасиро эҳсос намуда, аз ятимии худ ёд кунанд. Балки дар ятимхонаҳо онҳо илм омӯзанду дониш аз бар кунанд. Ҳамоиши ҷумҳуриявии ятимони кулл, ки рӯзи 20 апрели соли 2018 баргузор гардид, намунаи барҷастаи ин таваҷҷуҳу ғамхориҳост.

Ҳамоиши мазкур бо мақсади баланд бардоштани эҳсоси ватандӯстию хештаншиносии ҷавонон, ҷонибдорӣ аз ғамхориҳои падаронаи Асосгузори сулҳу ваҳдати миллӣ – Пешвои миллат, Президенти кишвар, муҳтарам Эмомалӣ Раҳмон нисбат ба ин қишри ҷомеа, ҳамзамон бо дарназардошти таъкиди Пешвои муаззами миллат “Ман ҳеҷ вақт ягон ятими куллро дар нимароҳ намемонам, меомӯзонам, тарбия мекунам, ва ба ҳаёти мустақилона гусел менамоям”, ки дар вохӯриашон бо ятимони кулл дар шаҳри Хуҷанди вилояти Суғд, санаи 29 марти соли 2018 баён доштанд, бо тасмими Кумитаи кор бо ҷавонон ва варзиши назди Ҳукумати кишвар миёни ятимони кулл дар сатҳи ҷумҳурӣ бо таҳияи барномаи мукаммал таҳти унвони “Пешвои миллат - ғамхори ятимон” баргузор намоянд.

Дар ин замина, санаи 20 апрели соли 2018 дар толори Кумитаи миллии олимпии Тоҷикистон вохӯрии раиси кумита бо 50 нафар ятимони кулл баргузор гардид, ки дар рафти чорабинӣ иштирокчиён бо туҳфаҳои хотиравӣ сарфароз гардонида шуданд. Ҳамзамон барои болидаруҳии онҳо дастархони идона ороста шуда, чорабинии фарҳангӣ низ доир гардид.

Мавриди зикр аст, ки ҳамоиши мазкур дар сатҳи ҷумҳурӣ баргузор гардида, баҳри дастгирию ҳавасмандгардонии ятимон аз ҷониби масъулини мақомоти иҷроияи ҳокимияти давлатии вилоят ва шаҳру ноҳияҳои ҷумҳурӣ чорабиниҳои сатҳи баланди фарҳангӣ бо густурдани дастархони идона ва туҳфаҳои хотиравӣ ташкил ва баргузор карда шуд.

Аз ҷумла, дар вилояти Хатлон, ки шумораи умумии ятимони кулл дар шаҳру ноҳияҳои вилоят 576 нафарро ташкил медиҳад, ва аз он 189 нафарашон духтарон мебошанд, ҷиҳати дастгирӣ намудани ятимони кулл 47300 сомонӣ кӯмакҳои пулии яквақтаина расонида шуд.

Инчунин, дар тамоми шаҳру ноҳияҳои вилояти Суғд мулоқоту вохӯриҳои раисони шаҳру ноҳияҳо бо ҷалби 1521 нафар ятимони кулл баргузор гардида, туҳфаҳои хотиравӣ супорида шуданд.

Чунин ҳамоиш дар ВМКБ бо ҷалби 168 нафар ҷавонони ятими кулл дар тамоми шаҳру ноҳияҳои вилоят доир гардида ба ҷавонон либосҳои варзишӣ, лавозимоти хониш ва маблағҳои пулӣ тақдим карда шуд.

Мавриди зикр аст ки, ҳамоиши ятимони кулл дар тамоми шаҳру ноҳияҳои тобеи марказ низ баргузор гардида, дар умум зиёда 400 нафар ятимони кулл ҷалб гардида ба онҳо дар ҳаҷми 8660 сомонӣ маблағҳои пулӣ ва дигар тӯхфаҳои хотиравӣ тақдим карда шуд.

Нилуфар Раҷабова хонандаи синфи 7 МТМУ №41 шаҳри Душанбе мебошад. Ӯ ятими кулл аст, аммо дар партави меҳрубонӣ ва ғамхориҳои падаронаи Роҳбари давлат ин ҳолатро то ҳол эҳсос накардааст: “Бо ҳукми тақдир гарчанде ятим монда бошем ҳам, ҳеҷ гоҳ худро ятиму бепарастор ҳис наменамоем. Зеро имрӯз дар зери сиёсати ғамхоронаи Пешвои миллат мо - ятимон ҳеҷ мушкилӣ надорем. Имрӯз тамоми шароиту имконот ҷиҳати илмомӯзии мо муҳайёст. Ҳеҷ ятим бояд худро танҳо наҳисобад, зеро имрӯз нигоҳи падаронаи Президенти кишвар ба мо хуб буда, ҳамеша ва дар ҳама ҳолат дастгири мо - ятимон мебошанд”, - мегӯяд ӯ.

Бежан Давлатов, ки имсол хатмкунандаи МТМУ №21 мебошад, ба ин андеша аст, ки дар тамоми солҳои ятимӣ, агарчи барояш ин ҳолат душвор аст, ғамхориҳо ва имтиёзҳои додаи Пешвои миллат ӯро рӯҳбаланд ва барои сохтани ояндаи нек таҳриқ медодааст: “Бекасӣ барои ҳама душвор аст. Агарчи ман ятими куллам, аммо то ҳол боре ҳам инро фикр накардам, ки ман бекасам. Бекас нафареро мегӯянд, ки дармондаву зор аст ва барои ҳалли мушкилиҳояш дар нимароҳ танҳо мемонад. Ғамхорӣ ва иқдомҳои наҷиби Пешвои миллат бошанд, ин эҳсоси манфиро аз сари мо дур кардааст ва яз ягон бобат танқисӣ намекашем.”

Аз андеша ва мулоҳизаи чанде аз ятимоне, ки дар ин ҳамоиш иштирок доштанд, маълум гардид, ки онҳо ғамхориҳои падаронаи Пешвои миллатро дар ҳар нафас эҳсос мекунанд ва боре ба мушкилӣ мувоҷеҳ нашудаанд. Онҳо ба ин андешаанд, ки дастгириҳои Ҳукумати кишвар ва Пешвои миллат ба мо – ятимон, ки муттакои асосии мост, моро ба ҳама хостаҳоямон мерасонад.