16 апрел дар ноҳияи Лахш Зулфиқор Гулаҳмадзода, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар доираи сафари кории худ ба ин ноҳия аз имконот ва шароти кории Бахши кор бо ҷавонон ва варзиши ноҳияи Лахш боздид намуд. Дар ин замина раиси Кумита бо гирандагони Стипендияи президентӣ дар ноҳия суҳбат кард.

Дар ин бора аз маркази таҳлил ва иттилооти Кумитаи кор бо ҷавонон ва варзиш хабар доданд.

Раиси Кумита зимни суҳбат фаъолияти волонтёрон ва стипендиантҳоро қаноатбахш арзёбӣ карда, гуфт, “фаъолияти бонизоми шумо ҷавонони саодатманди диёр метавонад, идеяҳои созанда ва ташаббусҳои нав ба навро рӯйи кор орад ва ин иқдомҳо метавонанд дар мавқеи устувор пайдо намудани ҷавонон ва фаъолнокии онҳо дар ҷомеа нақши муҳим бозад”.

- Таманно мекунем, ки шумо ҷавонони азиз ҳамеша чун неруи пешбаранда, созандагони имрӯзу фардои Тоҷикистони соҳибистиқлол ва пайравони асили Пешвои муаззами миллат бошед,- илова намуд раиси Кумита.