Дар идомаи силсиламулоқотҳои Кумитаи кор бо ҷавонон ва варзиши назди Ҳукумати ҷумҳурӣ бахшида ба “Соли ҷавонон” дар қисмҳои ҳарбии шаҳри Душанбе 8 август мулоқоти навбатӣ дар қисми ҳарбии 12019 Вазорати мудофиаи Ҷумҳурии Тоҷикистон доир гардид.

Дар вохӯрии мазкур масъулин аз Вазорати мудофиа ва Кумитаи кор бо ҷавонон ва варзиш иштирок ва суханронӣ намуданд.

Амир Иброҳимов, мутахассиси пешбари Раёсати кор бо ҷавонони Кутимаи кор бо ҷавонон ва варзиш, зимни баромади хеш роҷеъ ба нақши ҷавонон дар рушди ҷумҳурӣ суханронӣ намуда иброз дошт, ки “Пешвои миллат ҳангоми вохӯриҳояшон доим иброз медоранд, ки мо аз ҷавонон умеди зиёд дорем. Чунки нерӯ, симо ва муаррифгари давлату миллат имрӯзу фардо ҷавонон мебошанд. Маҳз бо ин мақсад соли ҷорӣ “Соли ҷавонон” эълон гардид. Имрӯз ҷавонони мо метавонанд, ки дар беҳтарин донишгоҳҳои дохиливу хориҷӣ касбу ҳунар омӯхта, дар оянда ҳамон донишҳои андӯхтаашонро дар кишвари хеш амалан татбиқ намоянду баҳри пешрафти ин меҳан саҳмгузор бошанд”.

Дар ҷараёни мулоқот ҳамчунин доир ба масъалаҳои фарҳанги либоспӯшӣ, танзими анъана ва ҷашну маросимҳои миллӣ ва гаравидани баъзе аз ҷавонон ба гурӯҳҳои ифротӣ ибрози назар карда шуд. Таъкид гардид, ки дар ин соли таърихӣ ҳар як ҷавон имрӯз бояд дар фикри ояндаи дурахшони хеш бошаду баҳри боз ҳам зеботару шукуфон гардидани ин сарзамин доим ҷаҳд намояд. Зеро “Соли ҷавонон” соли талош аст.

Ёдовар мешавем, ки Кумитаи кор бо ҷавонон ва варзиши назди Ҳукумати кишвар дар доираи “Соли ҷавонон” ва иҷроиши босифати нақшачорабиниҳои муштарак барои ошноӣ пайдо намудан бо ҳаёти сарбозон силсилаи мулоқоту вохӯриҳоро вобаста ба баланд бардоштани ҳисси ватандӯстӣ, худшиносиву худогоҳӣ, нигаҳдошт ва ҳифзи марзу буми кишвар давоми моҳҳои июл, август ва сентябри соли ҷорӣ дар тамоми қисмҳои ҳарбии шаҳри Душанбе ба роҳ мондааст.

Беҳрӯз ХОЛМУРОДОВ, “ҶТ”