Дар доираи сафари кории Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба шаҳру ноҳияҳои Вилояти Мухтори Куҳистони Бадахшон майдончаи варзишии маҳаллаи Санговаки ноҳияи Рӯшон бо дастгирии молиявии Барномаи рушди Созмони Милалаи Муттаҳид таъмиру таҷдид гардида, мавриди истифода қарор дода шуд.

Дар маросими ифтитоҳи расмии иншооти мазкур раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Гулаҳмадзода Зулфиқор Аҳмад, сардори Саридораи ҳифзи сирри давлатии назди Ҳукумати Ҷумҳурии Тоҷикистон - Шералӣ Мирзо ва Раиси ноҳияи Рушон - Аҳмадзода Илҳом Шамол иштирок ва суханронӣ намуда, аз дастгириву ташаббусҳои Пешвои миллат нисбат ба ин самти афзалиятноки соҳаи иҷтимоии кишвар андешаронӣ намуданд.

Сипас, дар фазои тантанавӣ ба чанде аз фаъолони маҳал бо мақсади ташвиқу тарғиби тарзи ҳаёти солим ва оммавигардонии варзиш туҳфаҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон эҳдо карда шуд.