Худойбердӣ Холиқназар, раиси Маркази тадқиқоти стратегии назди Президенти Тоҷикистон зимни нишасти хабарӣ, аз ҷумла, дар робита ба ҷалби ҷавонон ба созмону ҳаракатҳои иртиҷоӣ дахл карда, гуфт, ки имрӯз таблиғгарони ДИИШ имкониятҳои бисёр васеъ доранд. Аз ҷумла, тариқи шабакаҳои интернетӣ маводи худро бо чанд забон паҳн мекунанд. Ҳамчунин бо додани маблағҳои ҳангуфт бо роҳҳои фиреб ҷавононро ба доми худ меандозанд.

- ДИИШ барои ташкил кардани воҳидҳои худ танҳо дар ҳудуди Афғонистон 70 млн. доллари ИМА сарф кардааст. Ҳамаи ҳамин фаъолиятҳо нишон медиҳанд, ки бо роҳҳои классикӣ ё ин ки анъанавӣ имконияти пешгирии онҳоро ба даст оварда наметавонем, - афзуд Х. Холиқназаров.

Мавсуф дар давом иброз дошт, ки барои пешгирии ҷавонон аз шомилшавӣ ба гурӯҳҳои ифротӣ мо пеш аз ҳама дар миёни ҷавонон корҳои таблиғотӣ гузаронем: “Яке аз роҳҳои пешгирии онҳо паҳн кардани варақа ва китобчаҳои таблиғотӣ мебошад. Ман бо ҳамроҳии сардори Раёсати таҳлил ва ояндабинии сиёсати хориҷии марказ Абдуллоҳи Раҳнамо китобчаеро бо номи “Хатари тафаккури ифротӣ ва гурӯҳҳои ифротгарои динӣ чист?” аз чоп баровардем. Ин китобча симои аслии ДИИШ-ро нишон медиҳад. Ҳамин гуна китобчаҳо беҳтарин роҳи пешгирии ҷавонон аз ҳар гуна ҳаракатҳои террористию экстремистӣ шуда метавонад”, - қайд кард ӯ.