Соои 2025 дар кишвар 37 ҳолати муноқиша бо истифода аз корд миёни ҷавонону ноболиғон ба қайд гирифта шудааст, ки аз ин шумора 16 ҳолат гурӯҳӣ арзёбӣ мегардад. Дар ин бора имрӯз - 12 феврал дар нишасти Вазорати корҳои дохилии кишвар иттилоъ дода шуд. Зикр гардид, ки дар натиҷаи ин ҳодисаҳо 1 нафар ба ҳалокат расида, 12 нафар ҷароҳатҳои вазнини ҷисмонӣ бардоштаанд.

Рамазон Раҳимзода, вазири корҳои дохилии Ҷумҳурии Тоҷикистон омилҳои чунин муноқишаҳоро ба истифодаи беш аз ҳадди телефонҳои мобилӣ аз ҷониби ҷавонону ноболиғон гуфт.

Ба гуфтаи ӯ, ноболиғон ҳамчун хонанда ба шабакаҳои иҷтимоӣ ворид шуда, аз интернет истифода мебаранд ва ҳамзамон ба марказҳои дилхушӣ рафта, то дергоҳ дар он ҷо машғули истифодаи интернет мешаванд. “Дар натиҷа байни онҳо муноқиша ба миён омада, ба зӯроварӣ, истифодаи корд ва ҳатто ба ҳалокат расонидан оварда мерасонад”- иброз дошт вазир.

Ҳамзамон, таъкид гардид, ки аз ҷониби Вазорати корҳои дохилӣ миёни ноболиғон ва волидони онҳо дар самти пешгирии чунин ҳолатҳо корҳои фаҳмондадиҳӣ ба роҳ монда шудааст.

Вазир инчунин масъулияти волидон ва омӯзгоронро дар назорати рафтору тарбияи наврасон муҳим арзёбӣ намуда, аз онҳо даъват кард, ки дар пешгирии қонуншиканӣ саҳми фаъол гузоранд.

Фарзонаи УМАРАЛӢ, "ҶТ"