ҶАВОНОН
Ҷумъа 25 Май 2018 11:51
829
Бо ибтикори Комиссияи ҳуқуқи кӯдаки назди мақомоти иҷроияи маҳаллаи ҳокимяти давлатӣ дар ноҳияи Шоҳмансури шаҳри Душанбе ба муносибати 25-умин солгарди Истиқлолияти давлатии Тоҷикистон конфренсияи амалӣ таҳти унвони “Омӯзиш ва дар амал татбиқ намудани Паёми Президенти Тоҷикистон Эмомалӣ Раҳмон ба Маҷлиси Олӣ ва зурурати ворид гардидани тағйиру иловаҳо ба Конститутсияи (Сарқонуни) Тоҷикистон” баргузор гардид. 

Намояндаи Комиссия оид ба ҳуқуқи кӯдаки назди МИМҲД дар ноҳияи Шоҳмансур Далер Алиев иброз намуд: “Тавре, ки дар Паёми Пешвои миллат, муҳтарам Эмомалӣ Раҳмон ба Маҷлиси Олии Тоҷикистон аз 20 январи соли 2016 омадааст, соли 2015 бо вуҷуди таъсири буҳрони молиявию иқтисодии ҷаҳон ва афзоиши фишор ба иқтисоди миллии мо дар натиҷаи заҳмати аҳлонаи мардуми шарафманди кишварамон рушди мусбати иқтисодӣ ва устувории нишондиҳандаҳои макроиқтисодӣ таъмин гардида, ҳаҷми маҷмӯи маҳсулоти дохилӣ ба зиёда аз 48 миллиард сомонӣ, суръати афзоиши он ба 6 фоиз баробар шуд ва сатҳи тавварум 5 фоизро ташкил дод. Сатҳи камбизоатӣ то 31 фоиз паст гардида, маҷмӯи маҳсулоти дохилӣ ба ҳар сари аҳолӣ 3,8 фоиз зиёд шуд. Маблағи пасандозҳо дар давоми сол 9 миллиард сомонӣ ё 35 фоиз афзуд. Нишондиҳандаҳои зикршуда ба идома пайдо кардани тамоюли беҳтар гардидани вазъи демографӣ ва тандурустии аҳолӣ мусоидат намуданд, ки дар натиҷа дарозумрии миёнаи шаҳрвандон ба 73,5 сол расид ва шумораи фавти модарону кӯдакон нисбат ба солҳои пеш хеле коҳиш ёфт”. 



Ба гуфтаи Файз Гулмадов, масъули Академияи таҳсилоти Тоҷикистон, ҳукумат барои таъмин намудани пешрафти соҳаҳои илму маориф ҳамчун самти афзалиятноки сиёсати иҷтимоӣ аз тамоми имкониятҳо истифода карда, ба рушди илмҳои техникиву табиатшиносӣ аҳамияти аввалиндараҷа медиҳад ва доир ба баланд бардоштани сатҳу сифати таълим, ҷорӣ намудан ва васеъ гардонидани доираи истифодаи технологияҳои иттилоотиву коммуникатсионӣ, аз ҷумла шабакаи интернет дар низоми таҳсилот, таъмини самаранокии фаъолияти омӯзгорон ва такмили малакаи педагогии онҳо тамоми чораҳои заруриро амалӣ мегардонад. Соли 2016 барои тараққиёти соҳаи маориф 3 миллиарду 150 миллион сомонӣ пешбинӣ шудааст, ки нисбат ба соли 2015 10 фоиз ва дар муқоиса бо даҳ соли пеш 13 баробар зиёд мебошад.

Баҳриддинзода Субҳиддин, муовини аввали директори Маркази миллии қонунгузории назди Президенти Тоҷикистон, вобаста ба зарурати ворид гардидани тағйиру иловаҳо ба Конститутсияи Тоҷикистон маърӯза карда, аз ҷумла иброз дошт: “Зарурати ворид гардидани тағйиру иловаҳо ба Конститутсияи (Сарқонуни) Тоҷикистон пеш аз ҳама дар рушди устувори ҷомеа ва баланд бардоштани сатҳу сифати зиндагии мардум мебошад. Гузашта аз ин, ин барои рушди минбаъдаи демократикунонии ҷомеа, ҳифзи ҳуқуқу озодиҳои инсон ва шаҳрванд ва инчунин барои густариши таҳкими мақомоти давлатӣ низ мусоидат менамояд. Зарурати дигар мутобиқ ва мукаммал гардонидани меъёрҳои ҳуқуқии Конститутсия ба санадҳои ҳуқуқии байналмилалӣ ва инчунин риояи имлои забони тоҷикӣ мебошад”. 
   
Ҳамчунин, Гулҷаҳон Умарова, корманди ваколатдор оид ба ҳуқуқи инсон дар Тоҷикистон, Кароматулло Олимов, академики Академияи илмҳои Тоҷикистон ва дигарон нисбат ба мавзуъҳои конфронс ибрози андеша карданд.

Эзоҳи худро нависед



Рамзҳо дар расм

Рӯзнома

Назарсанҷӣ

  1. Ба фикри Шумо “Соли ҷавонон” чӣ гуна сипарӣ шудаистодааст?

Тақвим

Дш Сш Чш Пш Ҷ Ш Яш
30 1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31 1 2 3

Май 2018 c.