Бахшида ба 85-солагии таъсисëбии ДДХ ба номи академик Б.Ғафуров дар факултаи физикаю техникаи донишгоҳи мазкур конфронси илмию методии умумидонишгоҳӣ доир гардид.

Дар он профессорон, омӯзгорон, кормандон, магистрантон ва донишҷӯёни факултет ширкат варзиданд.

Хайрулло Сабуров, муовини ректор оид ба корҳои илмӣ, конфронсоро оғоз намуда, қайд кард баргузории конфронс барои баланд бардоштани сатҳу сифати таҳсилот, дарёфти истеъдодҳо, ҳамчунин барои ҷалби омӯзгорони ҷавон ба корҳои илмиву таҳқиқотӣ мусоидат хоҳад кард.

Дар ҷараëни конфронс Раҳим Назаров оид ба мавзӯи “Аз таърихи таъсисёбии факултети физикаю техника ва дастовардҳои он дар замони истиқлолият“, мудири кафедраи электроника, профессор Ҳ.Тошхӯҷаев дар мавзӯи “Оид ба истифодаи компютер ҳамчун воситаи таълим”, профессори кафедраи физикаи назариявӣ ва методикаи таълими физика Ҳ.Саидов дар мавзӯи “Истифодаи технологияи информатсионӣ дар таълими назариии физика”, сармуаллими кафедраи физикаи умумӣ ва ҷисмҳои сахт Р. Ҳалимов роҷеъ ба “Усулҳои муосири омода намудани муаррифӣ аз фанни физика (қисми механика)” маърӯза намуданд.

Ҳадаф аз баргузории конфронс баҳри дар амал татбиқ намудани «Барномаи рушди инноватсионии Ҷумҳурии Тоҷикистон барои солҳои 2011-2020», рушди ҳаматарафаи таълими фанҳои тахассусӣ ва ҷустуҷӯи усулҳои ҷадиди истифодаи технологияи муосир дар раванди таълим арзёбӣ шуд.

Саодат ИСМОИЛОВА, "ҶТ"