Доналд Трамп, президенти нави ИМА тасмим дорад, дар доираи нақшаи маҳдудсозии муҳоҷират ба Иёлоти Муттаҳида, дар Сурия барои гурезаҳо "минтақаҳои амн" таъсис диҳад.

Президенти нави ИМА таъкид кардааст, ки аз мушоҳидаи муборизаҳои Иттиҳоди Аврупо бо буҳрони шадиди муҳоҷират, ки асосан ба иллати ҷанги дохилии Сурия сар задааст, ба чунин тасмим расид. "Фикр мекунам, Аврупо иштибоҳи бузург кард, ки миллионҳо одамро иҷозат дод, то ба Олмону кишварҳои дигар ворид шаванд", - афзуд вай.

Доналд Трамп ташкили минтақаи амнро яке аз роҳҳои мубориза бо терроризм медонад. Ба назари ӯ, гурезаҳо ва муҳоҷирони дигари кишварҳои мусулмоннишин ба афзоиши терроризм сабаб шудаанд.