Варзишгари давраи шӯравӣ Олга Корбут, ки пас аз Бозиҳои олимпии соли 1972 дар Мюнхен машҳур гашта буд, панҷ медали олимпӣ ва ҷоизаҳои дигари худро дар музоядаи ИМА ба 333,5 ҳазор доллар фурӯхт.

Ширкати созмондиҳандаи музоядаҳо "Heritage Auctions" хабар дод, ки медали тиллои Корбут ба 66 ҳазор доллар фурӯхта шуд. Корбут, ки ҳоло 61 сол дорад, дар Беларус зода шуда, соли 1991 ба ИМА кӯчидааст.

"Gazeta.ru" навишт, ки Корбут мушкили молӣ дорад. “Медалҳо Корбутро аз гуруснагӣ наҷот доданд” – бо чунин сархат шабакаи Би-би-сӣ аз музояда хабар дод.

Корбут дар 17-солагияш, вақте ки 1 метру 50 сантиметр қад дошт, дар Олимпиадаи Мюнхен дар гимнастика унсурҳои навоваронаро ба намоиш гузошт ва пирӯзии дастаи ИҶШС-ро таъмин намуд. Чор сол баъд дар Монреал Корбут медалҳои тилло ва нуқра ба даст оварда, бо номи “гунҷишки Минск” шуҳрат ёфт.

Дар музояда Корбут, ҳамчунин либоси варзишӣ ва ҷоизаҳои дигари худро низ ба савдо гузошт.