Раиси вилояти Хатлон Давлатшоҳ Гулмаҳмадзода, 22 май ба мактаб -интернати кӯдакони ятиму бепарастори ноҳияи Вахш барои маросими муаррифии натиҷаҳои Лоиҳаи барқароркунии бинои мактаб-интернат ба ноҳияи Вахш ташриф овард.

Дар расми мавриди баҳрабардорӣ қарор гирифтани иншооти мазкур Давлатшоҳ Гулмаҳмадзода, ҷаноби Ҳаҷиме Китаока, сафири Ҷопон дар Тоҷикистон ва раиси ноҳияи Вахш Шарбатулло Азизулло ширкат намуданд.

Арзиши бунёди ду гармхонаи дегӣ ва таъмини дохили хобгоҳ бо мебелу рахти хоб дар муассиса-интернати кӯдакони ятиму бепарастори ноҳияи Вахш, ки кумаки бебозгашти мардуми Ҷопон ҳамчун рамзи дӯстӣ ва ҳамкорӣ байни Ҷопон ва Тоҷикистон маҳсуб мегардад, беш аз 80 ҳазор доллари амрикоиро ташкил медиҳад.

Давлатшоҳ Гулмаҳмадзода, зимни мулоқот бо роҳбарон, омӯзгорон, волидону хонандагони ин муассиса аз ҳамкориҳои судманд бо сафорати Ҷопон ва амалишавии Лоиҳаи барқароркунии бинои муассиса-интернати ятимон ва бепарасторони ноҳияи Вахш изҳори миннатдорӣ намуд.

Сафири Ҷопон дар Тоҷикистон Ҳаҷиме Китаока аз дидор бо раиси вилояти Хатлон изҳори хушнудӣ карда, иброз намуд, ки «Мо кӯшиш ба харҷ медиҳем, ки фаъолияти лоиҳаи мазкур низ натиҷаҳои хуб ба бор орад, то мардум онро ба манфиати хеш истифода карда тавонанд».

Умед Мирзоев, “ҶТ”