Ба ифтихори “Соли ҷавонон” дар ноҳияи Ишкошим чорабинии идона баргузор гардид, ки дар он раҳбарияти ноҳия, идораҳои маҳаллӣ, аҳли маориф, сокинон ва ҷавонону наврасон ширкат варзиданд.

Ба иттилои масъулини Бахши ҷавонон, варзиш ва сайёҳии ноҳия, беш аз 500 нафар ҷавонони фаъоли ноҳия бо шиору овеазаҳо аз кӯчаи Алигавҳар Набиев то Нафасбеки Раҳмонӣ роҳпаймоӣ намуданд.

Дар майдони марказӣ муовини раиси ноҳия Мусо Мирзоев ҷавононро ба ифтихори “Соли ҷавонон” таҳният гуфт: “Баҳри расидан ба ҳадафҳои созанда ҷавонони ноҳия бояд ҳамеша ҳамрадифи замона бошанд ва барои инкишофи тахассус, донишомӯзӣ, аз худ намудани илмҳои муосир талош намоянд”.

Сипас, раҳбарияти ноҳия 30 нафар ҷавонони фаъолро бо ифтихорномаву тӯҳфаҳои хотиравӣ қадрдонӣ кард.