Вобаста ба “Соли ҷавонон” эълон гардидани соли ҷорӣ роҳбарияти мақомоти иҷроияи маҳаллии ҳокимияти давлатии шаҳри Ҳисор саъй дорад, барои афзоиши фаъолияти зеҳнӣ, баланд бардоштани сатҳу сифати таълиму тарбия, касбомӯзӣ, бо шуғли муайян фаро гирифтани ҷавонон, таъмини иштироки фаъолонаи онҳо дар ҳаёти сиёсӣ, иҷтимоию иқтисодӣ, фарҳангию маърифатӣ, ҳамчунин ҷалби эшон ба корҳои идоракунӣ ва вафифаҳои роҳбарикунанда, як қатор корҳои назаррас ба сомон расонда шавад. Маҳз ташкил ва ба роҳ мондани чунин корҳо, аз ҷумла Рӯзи даъватшанда, вохӯрию мулоқоти хонандагони синфҳои болоӣ бо афсарони қисмҳои низомии ҳудуди шаҳр имкон дод, нақшаи ба сафи артиши миллӣ гусел намудани ҷавонон, сад фоиз иҷро гардад. Аз шаҳр ва деҳоти ҳудуди Ҳисор 227 нафар ҷавонон, дар мавсими баҳори ба сафҳои артиш даъват шуданд.

- Бахшида ба “Соли ҷавонон” мақомоти иҷроияи маҳаллии ҳокимияти давлатии шаҳр нақшаи чорабиниҳоро, иборат аз 40 банд ба тасвиб расондааст, - иброз намуд раиси шаҳри Ҳисор Шарифҷон Ҷумазода, зимни нишасти матбуотӣ. – Ин санад вазифаҳои сохторҳои давлатӣ ва ҷамъиятиро ҷиҳати ҳалли масъалаҳои муҳими ҳаёти ҷавонон дар самтҳои гуногун муайян намудааст. Ба роҳ мондан ва вусъат бахшидан ба ҳамкорӣ бо ҷавонон имкон медиҳад, пеши роҳи ҳар гуна амалҳои номатлуб, аз қабили пайвастан ба ҳаракату равияҳои хатарнок, нашъамандӣ, вайрон намудани тартиботи ҷамъиятӣ ва ғайра миёни ҷавонон хеле коҳиш ёбад. Дар ин самт он корҳои ба мо вобастаро саъй мекунем бе каму кост ба ҷо орем, то ин ки ҷавонони мо чун ворисони ҳақиқӣ ба воя расанд.

Т. Давлат, “ҶТ”