Бо мақсади иҷрои дастуру супоришҳои Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон вобаста ба фаҳмондадиҳии ворид намудани тағйиру иловаҳо ба Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» ба мардум, дар «Кохи Ватан»-и шаҳри Қӯрғонтеппа вохӯрии гурӯҳи кории Ҳукумати ҷумҳурӣ бо фаъолон ва сокинони шаҳр доир гардид.

Дар вохӯрӣ раиси шаҳри Қӯрғонтеппа Исмоилзода Абдуалим, муовини раиси вилояти Хатлон Хидирзода Махфират Умар, мудири шуъбаи дин, танзими анъана ва ҷашну маросимҳои Дастгоҳи иҷроияи Президенти Ҷумҳурии Тоҷикистон Одинашоҳ Вализода, вакили Маҷлиси намояндагони Маҷлиси Олии Ҷумҳурии Тоҷикистон Анвар Тағоймуродов, судяи Суди Олии Ҷумҳурии Тоҷикистон Муҳаммадшарофӣ Дилбар, мудирони шуъбаю бахшҳои МИҲД шаҳр, омӯзгорон, имомхатибони масҷидҳо, раисони маҳаллаҳо ва сокинони шаҳр иштирок намуданд.

Одинашоҳ Вализода, мудири шуъбаи дин, танзими анъана ва ҷашну маросимҳои Дастгоҳи иҷроияи Президенти Ҷумҳурии Тоҷикистон зимни баромади хеш моҳияти ворид намудани тағйиру иловаҳоро ба қонуни мазкур шарҳ дода, иброз дошт. - Аз ҷониби Маркази исломшиносии кишвар чанде пеш китобчае бо номи «Тартиби азодорӣ ва таъзия» бо теъдоди ним миллион нусха нашр гардидааст, ки он бояд ба омма дастрас карда шавад. Дар он тамоми маросимҳои азодорӣ бо шарҳу тафсилаш оварда шудааст- гуфт Одинашоҳ Вализода.

А. Тағоймуродов, вакили парлумони мамлакат, Муҳаммадшарофӣ Дилбар, судяи суди олӣ, Хидирзода М.У. муовини раиси вилояти Хатлон низ баромад намуда, фикру ақидаҳояшонро доир ба ин масъала баён намуданд. 

Баъдан миёни гурӯҳи корӣ ва иштирокчиёни маҷлис пурсишу посух доир гардид.

Умед МИРЗОЕВ, “ҶТ”