Намояндагони Ҳукумати кишвару ВМКБ, аз ҷумла муовини аввали раиси Кумитаи кор бо ҷавонон ва варзиш Назарзода Ризо, муовини раиси вилоят Орумбекзода Гулдаста, раиси шаҳри Хоруғ Маҳтобшозода Арамбегим Бозор, муовини раиси Кумитаи кор бо занон ва оилаи назди Ҳукумати ҷумҳурӣ Давлатзода Зулфия бо ҷавонону варзишгарон, хонандагони МТМУ ва муҳассилини макотиби олии вилоят зери шиори "Пешвои миллат рамзи иттиҳоду сарҷамъӣ ва саодату осудагии мост" силсилавохӯриҳо анҷом доданд.

Чунин мулоқотҳо дар доираи нақшаи чорабиниҳои кумита дар арафаи ҷашни ғалаба ва Рӯзи ҷавонони Тоҷикистон сурат гирифт.

Қайд гардид, ки бо заҳмату талоши хастанопазири Ҳукумати мамлакат, бахусус Пешвои муаззами миллат, муҳтарам Эмомалӣ Раҳмон баҳри солимӣ, таҳсилу фароғат, омӯзиши фанҳои замонавӣ, баланд бардоштани касбияти наслҳои имрӯзу фардо тамоми шароитҳо фароҳам оварда шудааст ва ҷавонон бояд ҳамвора талоши пешравӣ намоянд, то дар оянда фарзандони шоистаи Ватан - модари хеш гарданд.

Мавриди зикр аст, ки силсиласуҳбатҳо бо доираи васеи толибилмони МТМУ - и Хоруғ, мактаби Президентӣ, мактаб - литсеи Оғохон, донишҷӯёни Коллеҷи тиббии шаҳр, Донишгоҳи давлатии Хоруғ ба номи Моёншо Назаршоев ва дигар ҷавонону варзишгарони навоҳии вилоят рӯи кор омаданд.

Машҳур ИМОМНАЗАРОВ, “ҶТ”