Дар асоси дастуру супоришҳои Сарвари давлат кормандони бахши кор бо ҷавонон ва варзиши шаҳри Ваҳдат нақшаи чорабиниҳоро ба роҳ монда, дар ин моҳи шарифи Рамазон бо ҷавонону наврасони шаҳру деҳоти Ваҳдат вохӯриҳоро ташкил мекунанд.    

Тавре мудири бахши кор бо ҷавонон ва варзиши шаҳр Маъруфҷон Азиззода изҳор дошт, зимни вохӯриҳо ба наврасону ҷавонон бештар моҳияти қонунҳои амалкунанда дар бораи масъулияти падару модар дар тарбияи фарзанд ва танзими ҷашну анъана ва маросимҳо бештар баён карда мешаванд.

- Ба вохӯриҳо, ҳамчунин волидони ҷавонону наврасон даъват мешаванд, - гуфт зимни суҳбат М. Азиззода. - Ин имкон медиҳад ҳам волидон ва ҳам фарзандони эшон аз моҳияти қонунҳои амалкунандаи дар боло зикршуда бештар огаҳӣ пайдо намуда, ба суолҳои худ посух гиранд. Ҳоло қисме аз ҷавонони ноогоҳ ба ҳар гуна ҳаракату равиҳои зиёновар ворид мешаванд, ки ин бар зарари худи онҳост. Пас ҳангоми вохӯриҳо волидонро огоҳ месозем, ки дар тарбияи фарзандон ба саҳлангорӣ роҳ надиҳанд, то ин ки онҳо ба роҳи хато нараванд.