Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни сафари хеш ба вилояти Суғд дар шаҳри Хуҷанд барои кӯдакону наврасон кӯдакистони замонавии иборат аз 240 ҷойро ба истифода доданд.

Бинои кӯдакистон аз 3 ошёна ва таҳхона иборат буда, барои таъсиси 8 гурӯҳи тарбиявӣ, яъне 240 нафар кӯдакон дар ошёнаи 1-уму дуюм шароит фароҳам оварда шуда, барои маҳфилу баргузории машғулияту чорабиниҳо дар ошёнаи сеюм толорҳо мутобиқ аст.

Тибқи барномаи таълим, тарбия ва инкишофи кӯдак маҳфилу дарсҳои омӯзиши ҳисобу ҳарфҳо, мусиқӣ, компютерӣ, бозиҳои шавқовар ва ғайра таъсис дода мешавад.

Сарвари давлат дар суҳбат бо соҳибкорон, муаллимону мураббияҳо таъкид доштанд, ки ин имконияту шароити арзанда аз масъулон ва ҳамаи кормандони муассиса масъулияти дучанду истифодаи донишу маҳорат дар таълиму тарбияи кӯдакро тақозо мекунад.

Шодмон Нурматов, “ҶТ”