Бо иттилои дафтари матбуотии шаҳрдорӣ, дар арафаи иди мубораки Қурбон раиси шаҳри Душанбе Рустами Эмомалӣ куштани чорворо дар ин рӯзи барои мусулмонон гиромӣ, дар ҷойҳои муайян иҷозат додааст.

Чунончи, забҳи чорво дар ҳудуди ноҳияи Фирдавсӣ, дар кӯчаи Фучик, наздики корхонаи гӯшту консерва сурат хоҳад гирифт. Ҳамин тавр барои сокинони дигар навоҳии пойтахт, ки нияти анҷом додани қурбониро доранд, ҷойҳои муайян таъин шудааст. Ҳамчунин, барои сокинони пойтахт анҷом додани ин амал дар назди ҶДММ “Ёвар II”, воқеъ дар ҳудуди ноҳияи Рӯдакӣ равост. Дар дигар макон забҳи чорвои идона қатъиян манъ аст.

Рӯзи баргузории иди Қурбон дар саросари кишвар ҳанӯз расман муайян нагардидааст.