Чанде қабл бо ибтикори Федератсияи футболи вилояти Суғд мусобиқаи футбол оид ба дарёфти Ҷоми раиси вилояти Суғд байни дастаҳои футболбозони шаҳру навоҳии вилоят сурат гирифт.

1 декабр дар даври ниҳоӣ дастаи футболбозони "Суғдиён"-и шаҳри Бӯстон бо дастаи "Металлург"-и шаҳри Истиқлол бозӣ карда, дастаи "Металлург"-ро бо ҳисоби 3:1 шикаст дода, сазовори Ҷоми раиси вилояти Суғд гардид.

Дар натиҷа дастаи футболбозони шаҳри Бӯстон сазовори мақоми аввал ва соҳиби Ҷом, дастаи шаҳри Истиқлол сазовори мақоми дуюм ва дастаи ноҳияи Кӯҳистони Мастчоҳ сазовори мақоми сеюм гардиданд.

Дар маросими супоридани Ҷом, ифтихорнома ва сипосномаҳо раиси шаҳри Бӯстон Раъно Ҳошимзода ва муовини раиси федератсияи футболи вилояти Суғд Рустам Марофиев ширкат намуданд.

Ҳамин тариқ дар фарҷом баҳри дастгирии варзишгарон ва эҳёи дастаи футболбозони шаҳри Бӯстон аз номи Федератсияи футболи вилояти Суғд ба раиси шаҳри Бӯстон Раъно Ҳошимзода сипоснома тақдим карда шуд.

Шодмон НУРМАТОВ, “ҶТ”