Бо дастгирии Раёсати кор бо ҷавонон ва варзиши вилояти Суғд, 8 январ, дар ҳамкорӣ бо Бахши кор бо ҷавонон ва варзиши шаҳри Конибодом ҳамоиши волонтёрон бахшида ба солҳои 2019-2021 “Солҳои рушди деҳот, сайёҳӣ ва ҳунарҳои мардумӣ” баргузор гардид.

Дар мулоқот мудири Бахши кор бо ҷавонон ва варзиши шаҳри Конибодом Бобоева Шаҳноза, роҳбари маҳфили “Пайравони Пешвои миллат”- и Раёсати кор бо ҷавонон ва варзиши вилояти Суғд Ҷаъфаров Диловар, волонтёрони фаъоли Раёсат ва роҳбари маҳфили “Пайравони Пешвои миллат”- и Бахши кор бо ҷавонон ва варзиши шаҳри Конибодом Маҳкамова Мубина иштирок ва суханронӣ намуданд.

Ҳамоиши мазкур дар муассисаи таҳсилоти миёнаи умумии рақами 4-уми шаҳр гузаронида шуда, дар он бобати ҷалби волонтёрон ба корҳои хайрхоҳӣ ва пешбурди фаъолияти волонтёрӣ суханрониҳо сурат гирифта, гуфта шуд, ки фаъолияти волонтёрӣ дар Тоҷикистон тавонист, ки дар камтарин муддат таъсис ёбад, ташаккул намояд ва ба сӯи рушд равона шавад. Ҳатто барои ба танзим даровардани ин намуди фаъолият қонун низ қабул карда шудааст.
Мувофиқи моддаи якуми ин қонун Волонтёр шахсест, ки ихтиёран ва бо интихоби озод вақт, кор ва малакаи худро бемузд ва ё ҷуброни хароҷот бевосита ва ё бавоситаи ташкилотҳои ҷалбкунанда ба манфиати ҷомеа пешниҳод менамояд.

Пас аз анҷоми мулоқот аз тарафи маҳфили ҳаҷвнигорони “Хандарез”-и Раёсат дар якҷоягӣ бо волонтёрони шаҳри Конибодом барномаи фарҳангӣ ва ҳаҷвӣ пешкаш гардида, сипас мувофиқи барнома волонтёрон аз мавзеъҳои таърихию сайёҳии шаҳри Конибодом дидан карданд.

Шодмон НУРМАТОВ, “ҶТ”