Филиали ташкилоти ҷамъиятии Иттифоқи ҷавонони Тоҷикистон дар шаҳри Хоруғи Вилояти Мухтори Кӯҳистони Бадахшон кушода шуда, расман ба фаъолият шурӯъ намуд.

Дар ин бора Сураҷ Чоршанбиев, сардори Раёсати кор бо ҷавонон ва варзиши вилоят иттилоъ дода гуфт, ки дар ояндаи наздик шуъбаҳои он дар ҳамаи ноҳияхои ВМКБ кушода мешаванд ва минбаъд барои иҷроиши қарори ҳайати мушовараи он аъзоёни дигар аз шаҳру навоҳӣ ҳам ҷалб мешаванд.

Мавриди зикр аст, ки Иттифоқи ҷавонони Тоҷикистон ташкилоти мустақили ҷамъиятӣ буда, дар қаламрави ҷумҳурӣ амал мекунад ва ба сафҳои он ҷавонони дорои ҳисси баланди худшиносии миллӣ, номуси ватандорӣ, тафаккури созанда ва эҷодкор, сарфи назар аз мақоми иҷтимоӣ, мансубияти динӣ, миллию нажодӣ ихтиёран шомил мегарданд.

Машҳур ИМОМНАЗАРОВ, "ҶТ"