Вобаста ба таҳкими сарҳадии давлатии Ҷумҳурии Тоҷикистону пешгирии шомилшавии ҷавонон ба гурӯҳҳои экстримистию террористӣ раиси ноҳияи Дарвоз Абдураҳмонзода Саидбурҳони Саидраҳмон ва раиси Кумитаи давлатии амнияти миллии Ҷумҳурии Тоҷикистон Саймумин Ятимов бо сокинону ҷавонони ноҳия мулоқот намуданд.

Тавре Хуршед Ғаффоров, корманди Бахши кор бо ҷавонон ва варзиши ноҳияи Дарвоз иттилоъ дод, дар вохӯрӣ инчунин омӯзгорону зиёиён, кормандони идораву муассисаҳои маҳаллӣ, роҳбарону афсарони қисмҳои низомӣ ва дигар сохторҳои қудратӣ иштирок намуданд.

Таъкид шуд, ки феълан ҳузури гурӯҳҳои болозикр дар ҳамсоякишвари Ҷумҳурии исломии Афғонистон бештар шуда, баҳри аз даст надодани зиракии сиёсӣ ва муқовимат бо ин падидаҳои муосир қабл аз ҳама ҷавононамон бояд омода бошанд. Мақсади гурӯҳҳои нохалафу моҷароҷӯ дар ҳамаи давру замон танҳо хароб кардан, сӯзондани ин ё он кишвар буда, инро набояд касе аз хотир барорад.

Баъдан миёни роҳбарияти ноҳия, КДАМ ва ҳозирин оид ба дигар масоил табодули афкор сурат гирифт.

Машҳур ИМОМНАЗАРОВ, "ҶТ"