Дар қисми низомии қӯшунҳои сарҳадии 0202 КДАМ ҶТ, воқеъ дар шаҳри Истаравшан, маросими савгандёдкунии наваскарон бо иштироки 80 нафар сарбоз баргузор шуд.

Дар чорабинӣ кормандони МИҲД- шаҳр, муовини аввали раиси шаҳр Абдусаттор Қодирӣ, намояндаи Раёсати кор бо ҷавонон ва варзиши вилояти Суғд Шаҳбозҷон Ахмедов, раиси ҲХДТ дар шаҳр Мирзоев Комилҷон, раиси иттифоқи ҷанговарони афғон ва сохти конститутсионӣ Мирзо Олимов, мудири Бахши кор бо ҷавонон ва варзиши шаҳри Истаравшан Ҳотамзода Аскар ва волидайни сарбозон ширкат варзиданд.

Бояд қайд намуд, ки ҳар як наваскар барои ҳифзи марзу буми кишвар дар пеши яке аз муқаддасоти миллӣ -Парчами давлат қасам ёд кард.

Дар рафти чорабинӣ як қатор афсарон ва аскарони шуҷоъ барои хизмати содиқона ва софдилона бо медалҳои дараҷаҳои гуногун сарфароз гардонида шуданд. Баъдан намояндаи Раёсати кор бо ҷавонон ва варзиши вилоят ба хазинаи китобхонаи қисми низомӣ тӯҳфаҳои хотиравӣ ва китобҳои бадеӣ супорид.

Шодмон НУРМАТОВ, "ҶТ"