Санаи 24.12.2019 дар толори калони Мақомоти иҷроияи ҳокимияти давлатии шаҳри Истаравшан мулоқоти иҷрокунандаи вазифаи раиси шаҳр бо ҷавонон дар мавзӯи "Терроризм ва экстремизмро маҳдуд менамоем!" баргузор гардид.

Дар мулоқот и.в. раиси шаҳр Амирхон Қурбонзода, муовинони раиси шаҳр, сардори Раёсати маорифи шаҳр Д. Азимов, мудири бахши кор бо ҷавонон ва варзиши шаҳри Истаравшан А. Ҳотамзода, мудири шӯъбаи кор бо занон ва оила Ф. Мӯъминова, аъзои ташкилоти ҷамъиятии "Пайравони Пешвои миллат", гурӯҳи «Авангард»-и шаҳр ва инчунин хонандагону донишҷӯёни муассисаҳои давлатии таълимӣ ширкат варзиданд.

Як қатор ҷавонони фаъоли шаҳр барои саҳми арзанда дар пешгирии падидаҳои номатлуби ҷомеа- экстремизм ва терроризм, фаъолияти шоиста ҷиҳати баланд бардоштани сатҳи маърифатнокии ҷавонон ва иштироки фаъолона дар чорабиниҳои сиёсӣ, оммавӣ-фарҳангӣ бо сипоснома ва тӯҳфаҳои хотиравии раиси шаҳр сарфароз гардонида шуданд.

Бояд гуфт, ки ин мулоқот ҷиҳати иҷро ва татбиқи "Стратегияи миллии Ҷумҳурии Тоҷикистон оид ба муқовимат ба экстремизм-терроризм барои солҳои 2016-2020", баланд бардоштани ҳисси ватандӯстиву хештаншиносӣ, дур будан аз ҳама гуна ҳизбу ҳаракатҳои ифротгароӣ замина гузошт.

Шодмон НУРМАТОВ, "ҶТ"