Дар толори маҷлисгоҳи Донишгоҳи давлатии омӯзгории Тоҷикистон ба номи С.Айнӣ ҷаласаи ғайринавбатии Шӯрои олимон доир гардид, ки дар он ҳайати омӯзгорон ва роҳбарияти донишгоҳ иштирок намуданд.

Тибқи рӯзномаи ҷаласа ректори донишгоҳ Ғаффорӣ Нуъмонҷон Усмонзода фаъолияти донишгоҳро дар соли 2019 натиҷагирӣ карда, вазифаҳоро барои соли 2020 ироа намуд. Мавсуф зикр намуд, ки натиҷаҳои донишгоҳ нисбат ба ҳамин давраи соли қаблӣ назаррас буда, барои натиҷаҳои аз ин ҳам беҳтар ноил шудан, боз ҳам кӯшиш кард.

Муовини ректор оид ба корҳои илм А. Мирзораҳимов дар рафти суханронии хеш таъкид намуд, ки соли 2020 соҳаи илм кӯшиш ба харҷ хоҳад дод, то дар миёни донишгоҳҳои кишвар ДДОТ мақоми волоеро касб намояд.

Дар охири ҷаласа омӯзгорон ва дигар кормандоне, ки дар соли 2019 ба натиҷаҳои беҳтарин ноил шуда буданд, аз ҷониби Раёсати донишгоҳ бо ифтихорнома ва мукофотпулӣ қадрдонӣ шуданд.

Малоҳат ХОЛМУРОДОВА “ҶТ”