Чанде пеш дар Сафорати Ҷумҳурии Тоҷикистон дар Ҷумҳурии Исломии Афғонистон ба муносибати 111-мин солгарди устоди баруманди тоҷик ва нашри нави шоҳасари илмии ӯ “Тоҷикон” нишасти илми-фарҳангӣ таҳти унвони “Бобоҷон Ғафуров сиёсатмадор, донишманд, пайвандгари халқҳо ва фарҳангҳо” баргузор гардид.
  
Дар нишаст донишмандон ва аҳли фарҳанги шинохтаи Афғонистон иштирок намуданд. Сафири Ҷумҳурии Тоҷикистон Шарофиддин Имом оиди ҳаёту фаъолияти сиёсии ин фарзанди фарзонаи миллат баромад карда, таъкид намуд, ки китоби “Тоҷикон”-и Бобоҷон Ғафуров шоҳасари бунёди илмӣ буда, мислаш дар минтақа вуҷуд надорад.

Донишмадони илму фарҳанги ҳамсоякишварамон Афғонистон Бобоҷон Ғафуровро ҳамчун шахси бузурги сиёсию илмӣ арзёбӣ карда, таъкид намуданд, ки ӯ дар пайванди фарҳангу миллатҳо, хусусан Афғонистону Тоҷикистон нақши бағоят бузурге дорад.

Дар ҷамъбаст Сафири Ҷумҳурии Тоҷикистон навиди навбатиро аз Паёми Пешвои миллат муҳтарам Эмомалӣ Раҳмон оиди чоп ва тақдими китоби “Тоҷикон” ба ҳар хонадони тоҷик аз номи Пешвои миллат расонид ва аҳли илму фарҳанги ҳамсоякишвар-Афғонистон ин иқдомро хуб арзёбӣ намуданд.

Дар поёни нишаст ба иштирокчиёни чорабинӣ нашри нави дарии “Тоҷикон” тақдим гардид.

 Рустам ОДИНАЕВ, “ҶТ”