Терроризм ва гурӯҳҳои радикалӣ дар таърихи инсоният аз давраҳои хеле қадим зуҳур намуда, дар шаклу намудҳои мухталиф фаъолият менамуданд ва дар ҳамаи ин марҳилаҳо мақсадашон ноором сохтани ҷомеа буд.

Аз нигоҳи коршиносон баъди ҷанги дуюми ҷаҳонӣ ва ба ду лагер ҷудо шудани шаклҳои гуногун фаъолияти ин гурӯҳҳои ифротӣ хеле авҷ гирифт. Чун ҷомеаи ҷаҳонӣ пеш рафт, дастгоҳҳои таблиғотӣ рушд намуд. Терроризм дар шаклҳои гуногун ва бо ақидаҳои гуногуни динию мазҳабӣ фаъол гаштанд. Имрӯзҳо ифротгароиҳои динӣ дар мамлакатҳои шарқ чун Афғонистон, Ироқ Шом, Филлипин хеле авҷ гирифтааст,ки оқибати фоҷиабори онро мо хуб дида истодаем. Барои мисол ба таърихи 40 соли охири Афғонистони ба мо ҳамсоя менигарем, ки ин кишвар аз дасти гурӯҳҳои ифротгарои мазҳабӣ ба чи ҳоли табоҳ расидааст. Давлати мо дар марҳалаи нави ҷомеасозӣ гом мезанад ва ҳадафаш муҳайё намудани ҷомеаи солими демократист, ки мо марҳала ба марҳала ноил шуда истодаем. Пешравии ҳаёти ҷомеаи кишвар, сулҳу суботи он ва фазои ҳамдигарфаҳмии имрӯзаи мо, гурӯҳҳои мухолифинро имрӯзҳо хориҷ аз кишвар зиндагӣ доранд, ором намегузоранду бо ҳар баҳона дар расонаҳои хабарии ҷаҳон ба мо буҳтон мезананд.

Дар кишвари мо ҳамаи шароитҳо барои диндорон муҳайё мебошад. Дар замони Ҳукумати Шӯравӣ ҳамагӣ 30 нафар сокинони кишвари мо ҳаҷи фарзиро иҷро намуда буданду халос. Аммо таи солҳои даврони Истиқлолият сол то сол 5 ҳазор нафар сокинони кишвар ҳаҷи фарзиро ба ҷо меоранд. Шояд ҳамин миқдор ҳаҷи умраро сомон диҳанд. Дар ҳар деҳа биноҳои ҳозиразамони масҷидҳои ҷомеаю панҷвақта амал мекунанд. Барои омода намудани мутахассисони динӣ бошад, дар пойтахти кишвар Донишкадаи исломии ба номи Имоми Аъзам амал мекунад. Аз ин беш боз чӣ мехоҳем? Ин ҳама аз рушди оянда ва маданияти баланди динӣ хабар медиҳад.
Дар фароварди сухан ҳамаи маруми кишварро ба ободкорию созандагӣ даъват менамоям. Мо бояд дар ин замони пурмоҷаро худшиносии миллиамонро инкишоф диҳем, хештаншинос бошем, ватанро дӯст дорему ободаш намоем.

Рустам СОЛЕҲОВ, сармутахассиси
шуъбаи маорифи ноҳияи Восеъ