Дар МТМУ № 56-и ноҳияи Кӯшониён аз ҷониби шӯъбаи Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон машқи амалии фармондеҳии ситоди мудофиаи гражданӣ гузаронида шуд.

Машқи мазкур бо мақсади санҷидани сатҳи омодагии мақомоти идоракунӣ, дониши ҳайати роҳбарикунанда, нерӯҳои ғайриҳарбии мудофиаи гражданӣ, такмили малакаи мустақилона амал намудан дар ҳамагуна вазъият баргузор гардида, ба таъкиди масъулин ҳадаф аз он ҳангоми рух додани ҳолатҳои фавқулода, аз ҷумла боришоти зиёди борон ва обхезӣ дар деҳаҳои Сари Пул ва Дӯстии Ҷамоати шаҳраки Бохтариён аз ҷои хавфнок ба ҷои бехавф кӯчонидани сокинон ва таъминоти онҳо бо эҳтиёҷоти зарурӣ мебошад.

Тибқи сенарияи баргузории машқи мудофиаи гражданӣ, баъди садо додани бонги хатар кормандони Кумитаи ҳолатҳои фавқулода ва мудофиаи гражданӣ ва нерӯҳои ғайриҳарбии мудофиаи гражданӣ даҳҳо нафар сокинонро аз маҳалли ҳодиса тавассути нақлиёт ба макони муайянгардидаи эвакуатсиони оварда, баъди бақайдгирӣ ва санҷидани ҳолати саломатӣ онҳоро дар хаймаҳо ҷойгир карданд.

Дар охир ташкилоту идораҳо ва нафароне, ки дар баргузории тадбири мазкур саҳм гузоштанд, бо сипоснома сарфароз гардонида шуданд.

 Таваралӣ СОҲИБНАЗАРОВ, “ҶТ”