Дар ноҳияи Ҷайҳуни вилояти Хатлон аз ҷониби Федератсияи велосипедронони мамлакат мусобиқаи дучархаронӣ баргузор шуда, дар он 45 нафар варзишгар аз ҳама шаҳру навоҳии кишвар ширкат намуданд.

Тавре масъулин иттилоъ доданд, мақсади асосии баргузор намудани мусобиқа, ин дарёфт ва интихоби варзишгарони беҳтарини ин риштаи варзиш, ҷалби онҳо ба дастаи мунтахаби кишвар ва иштироки фаъолона дар чемпионати Осиё оид ба велосипедронӣ, ки соли равон дар давлати Малайзия баргузор мегардад, иборат мебошад.

Варзишгарон дар макони баргузории чорабинӣ, ки шоҳроҳи Дӯстӣ-Панҷи поён интихоб гардида буд, ҳозир шуда, аз рӯи категорияҳои муайян дар масофаҳои гуногун миёни ҳам сабқат намуданд.

Аз рӯи тартиб аввал хурдсолон ва духтарон дар масофаи 40 километр ва навбати дигар ҷавонону калонсолон дар масофаи 80 километр рақобати дучархаронӣ карданд. Ҳамин тавр варзишгарони пешсаф аз руи 4 номинатсия ғолиб дониста шуда, бо ифтихорнома ва медалҳои мусобиқа сарфароз гардонида шуданд.

Масъулини Федератсияи велосипедронони ҷумҳури ёдовар гардиданд, ки 12 нафари варзишгарони ғолибгаштаи мусобиқаи имрӯза дар марҳилаи дувум, ки рӯзи 23 феврали соли ҷорӣ доир гардид, аз рӯи 4 категория миёни ҳам сабқат карда, аз ҳар гурӯҳ танҳо як нафарӣ барои иштирок дар Чемпионати Осиё оид ба дучархаронӣ роҳхат гирифтанд.

Таваралӣ СОҲИБНАЗАРОВ, “ҶТ”