Замони ҷанги дуюми ҷаҳон нисбати мардуми яҳуд аз ҷониби фашистони олмонӣ қатли ом ё бо баёни маъруф генотсид роҳандозӣ гардида буд. Бар асари он миллионҳо нафар яҳудӣ, чи марду зан, чи пиру барно аз дами теғи фашистон ба ҳалокат расиданд.

Мутаассифона, ҳоло чунин бадкирдорию бераҳмӣ аз ҷониби миллате амалӣ мешавад, ки замоне худ гирифтори он буд. Яъне яҳудиҳо, нисбати мардуми фаластин ва дар сарзамини худи эшон. Яҳудиёне, ки ба ҷуз Муҳаммад (с)-и араб, боқимонда паёмбаронро Офаридгор аз қавми эшон, чун фиристодаи хеш барои инсоният пазируфтааст. Маълум, ки саркардаҳои яҳудиёни имрӯз дар гирдоби ҳаракати иртиҷоии сайҳунизм ғӯтида, тақдири талхи хешро ба гӯшаи фаромӯшӣ гузоштаанд.

Сарнавишти талхи мардуми Фаластин замони таҳти тасарруфи англису фаронсавиҳо будан, дар даҳсолаи дуввуми асри пешин сурат гирифт. Сарвазири онвақтаи Бритониё ҷаноби Балфур тасмим гирифт, ки дар сарзамини Фаластин давлати яҳудиҳоро барпо месозад. Он замон мардуми яҳуд ҳамагӣ панҷ фоиз аҳолии умумии Фаластинро ташкил медоду халос.

Пас аз анҷоми ҷанги дуюми ҷаҳон бо қарори СММ, соли 1947 замини Фаластин байни мардуми таҳҷо ва яҳудиён тақсим карда шуд. Фаластиниҳо то 49 фоиз заминҳои хешро соҳиб шуданду боқимондаро мардуми яҳуд. Ин ҷо дастгирии яҳудиён аз ҷониби ҳукуматдорони амрикоӣ нақши калидӣ бозид. Дастгирие, ки то кунун идома дорад. Ҳамин тавр, дар хоки Фаластин мардуми яҳуд соҳибватан гардиду мардуми таҳҷо не. Аз ҳар гӯшаю канори олам яҳудиён ба ватани нав, Исроил кӯчонда ва оварда шуданд.

Бо ин ҳама қаноат накарда, ҳукуматдорони исроилӣ сиёсати ишғолгаронаро пеш гирифтанд, ки боиси ҷанг дар соли 1948 гардид. Дар натиҷа ишғолгарон то 78 фоизи заминҳои фаластиниҳоро ба тасарруфи худ дароварданд.

Ҷанг байни кишварҳои арабӣ ва яҳудиён дар соли 1967 вазъи мардуми фаластинро боз ҳам табоҳ кард. Кунун мардуми фаластин дар қисмати ғарбии соҳили рӯди Урдун ва минтақаи Ғозаҳ, зери назорати сахт, дар ҳоли чошу парешон қарор дорад. Ҳамагӣ дар 22 фоиз замини хеш. Барои аз маконе ба макони дигар сафар намудан эшонро лозим аст, чандин дидбонгоҳҳои ҳарбиёни исроилиро убур созанд. Бо ин ҳам қаноат накарда, сайҳунистон саъй доранд фаластиниҳоро аз боқимонда заминҳои дар ихтиёр дошта, зӯран берун намоянд. Манзилу хонаҳои эшонро ба замин яксон карда, маҳаллаҳои нави аҳолинишин барои яҳудиён бунёд месозанд.
Беҳуқуқӣ, таҳқиру таъқиб ва озорҳои пайваста ва кушторҳо боис шуда, ки нисфи мардуми фаластин тарки ватан намояд. Ҳоло дар ватани аҷдодӣ то 7 миллион мардуми фаластин зист дорад. Беш аз 7 миллиони дигар берун аз кишвар дар ғарибию дарбадарӣ.

Аҷиб он аст, ки сайҳунистон бо дастгирии бевоситаи амрикоиҳо ҳама гуна ҳуҷҷатҳои қабул намудаи СММ-ро бобати беҳдошти рӯзгорои мардуми Фаластин пушти по зада, забткориҳои хешро анҷом намебахшанд.
Собиқ сарвазири Исроил Ариэл Шарон, ки дар қатлу куштори мардуми фаластин хеле ҳиссагузор буд, билохира боре ба исроилиён ҳушдор дод: “Ба мардуми фаластин имкони зисти осоишта бояд дода шавад. Зеро мумкин аст Салоҳиддини нав пайдо гардад”. Салоҳиддини курди форсзабон, ки ҳангоми юришҳои салибдорони аврупоӣ дар асрҳои миёна ба Шарқи наздик, на танҳо баҳри ҳимояи мардуми араб, ҳамчунин яҳудиён, чун лашкаркаши ғаюр дар саргаҳи муборизаҳо қарор дошт. Муқовимати даҳсолаҳо шояд Салоҳиддини навро ба арсаи набардҳо биёрад.

Т. ДАВЛАТ, “ҶТ”