Дар шаҳри Абу Дабӣ ғолибони озмуни ҷоизаи байналмилалии ба номи Шайх Зайд бинни Султон натиҷагирӣ карда шуда, дар қатори 10 нафар ҷоизадорони озмун хонандагони гимназияи ба номи Гётеи шаҳри Хуҷанд низ барандагони озмун эълон гардиданд.

Озмун дар се марҳила сурат гирифта, он ҷамъбаст шуд. Довталабони озмун лоиҳаҳои мухталифи худро доир ба навоварӣ дар таъмин намудани системаҳои мухталифи ахбор, беҳтар кардани моделҳои устувори кишоварзӣ, беҳтар кардани система ва идоракунии электрикӣ, мусоидат ба тавонмандии занон, васеъ намудани дастрасӣ ба оби тозаи ошомиданӣ, дастовардҳои инноватсионӣ дар рушди устувор ва ғайраҳо буданд. Дар маросими ҷоизасупории озмун пешвоёни собиқи ҷаҳонӣ, вазирони корҳои хориҷии Иттиҳоди Аврупо, инчунин соҳибкорони бонуфузи сатҳи ҷаҳонӣ ва хайрхоҳон иштирок доштанд.

Ҳайати ҳакамоти озмун аз миёни 31 тими довталаб 10 гуруҳро ғолиб эълон доштанд: 4 гурӯҳ аз Африқо, 1 дастаи Гватемала, 1 дастаи Амрико, 1 дастаи Филипин, 1 даста аз Ҳиндустон, 1 дастаи Тоҷикистон, 1 даста аз Аморати Муттаҳидаи Араб. Ифтихори Ҷумҳурии Тоҷикистон аст, ки дар миёни ин давлатҳо хонандагони гимназияи ба номи Гёти шаҳри Хуҷанд ғолибиятро ба даст оварданд.

Ғолибияти мазкур имкон медиҳад, ки аз ҷониби муассисони озмун соли ҷорӣ гимназияи ба номи Гётеи шаҳри Хуҷанд бо таҷҳизоти офтобии барқтаъминкунанда таъмин карда шавад.

 Шодмон НУРМАТОВ, “ҶТ”