Дар муассисаҳои олии вилояти Хатлон миёни донишҷӯён фестивали бозиҳои варзишӣ баргузор гардид. Дар ин бора аз Раёсати кор бо ҷавонон ва варзиши вилоят иттилоъ доданд.

Тибқи иттилои манбаъ, Фестивали бозиҳои варзишӣ бо ибтикори Раёсати кор бо ҷавонон ва варзиш ва Мақомоти иҷроияи ҳокимияти давлатии вилояти Хатлон ба роҳ монда шуда, дар Маҷмааи варзишии ноҳияи Данғара доир гардид.

Гуфта мешавад, ки Фестивал аз рӯи намудҳои гӯштини миллӣ, варзиши сабук, волейбол, футбол ва шоҳмот гузаронида шуд.

Анзурат Абдусаломзода, муовини раиси вилояти Хатлон зимни суханронии хеш ҳангоми ифтитоҳи чорабинӣ иброз дошт, ки баргузории чунин фестивалҳо баҳри мустаҳакам намудани дӯстии ҷавонон доир гардида, аз ҷониби дигар дар пешгирии ҳама гуна зуҳуроти номатлуб нақши созгор хоҳад гузошт.

Дастовардҳои варзишгарони вилоятро Анзурат Абдусаломзода аз шароити муносиби муассисаҳои варзишӣ ва таваҷҷуҳи хосаи Пешвои муаззами миллат маънидод намуд.

Мавриди зикр аст, ки дар вилояти Хатлон дастаҳои варзишӣ аз 7 донишгоҳу донишкадаҳои вилоят иштирок карда, дар намудҳои гуногуни варзиш маҳорати баланд нишон доданд.