Аз Ҷумҳурии Тоҷикистон ба Канада беш аз 326 паноҳандаи афғон интиқол дода шуданд. Гуфта мешавад, ки паноҳандагон бо се парвоз ба ин кишвар интиқол ёфтаанд. Дар ин бора хабаргузории форсии “Pars Today" иттилоъ додааст.

Ба иттилои манбаъ, вазири муҳоҷирати Канада Шон Фрейзер дар саҳифаи твитерии худ навиштааст, шумори афғонҳое, ки то кунун ба Канада расидаанд, 21 ҳазору 700 нафарро ташкил медиҳад.

Бояд гуфт, ки шаҳрвандони Афғонистон, пас аз ғасби қудрат дар ин кишвар аз ҷониби Толибон маҷбур ба тарки кишварашон шудаанд. Дар ин ҳол, Душанбе нахуст эълом дошт, ки то 100 ҳазор паноҳандаи афғонистониро қабул мекунад. Тоҷикистон ягона кишваре дар Осиёи Марказӣ боқӣ мемонад, ки паноҳҷӯёни афғонистониро пазируфтааст.

Ба гуфтаи Агентии паноҳандагони Созмони Милали Муттаҳид (UNHCR) то тобистони соли ҷорӣ бештар аз 8500 паноҳҷӯи афғонистонӣ дар Тоҷикистон ҳузур доштанд. Аз ин теъдод 5700 нафар пас аз ғасби қудрат дар Афғонистон аз ҷониби Толибон дар моҳи августи соли гузашта омадаанд.