Имрӯз - 10 апрел дар Китобхонаи миллии Тоҷикистон рунамоии китобҳои "Эмомалӣ Раҳмон Ҷамшеди рӯзгори мо" ва "Наврӯз аз Рӯдакӣ то имрӯз" доир гардид.

Ин чорабинӣ бо ташаббуси Китобхонаи миллии Тоҷикистон, Анҷумани тоҷикон ва форсизабонони ҷаҳон - "Пайванд" ва Китобхонаи устод Халилӣ ташкил карда шуда, дар он Давлат Сафар, муовини вазири фарҳанги Ҷумҳурии Тоҷикистон, роҳбарияти Китобхона ва шахсиятҳои барҷастаи фарҳангии кишвар иштирок карданд.

Ин ду асар ба муносибати ҷашни бостонии Наврӯзи фархундапай ва ба пешвози 35-умин соли ҷашни Истиқлоли давлатии Тоҷикистон ба нашр расидаанд.

Китоби "Наврӯз аз Рӯдакӣ то имрӯз " бахшида ба ҷашни бостонии Наврӯзи фархундапай аз тарафи Китобхонаи устод Халилӣ ва дар таҳияи Ҷаъфар Ранҷбар омода шуда, ин гулдастаи зебои ҳамдилӣ ва ҳамзабонӣ дарбаргирандаи сароиши бештар аз сад шоири клоссик ва муосири кишварҳои қаламрави Наврӯз дар васфи баҳору Наврӯз ва шарҳи аҳволи онҳо мебошад.

Ин асар қаблан ба пешвози ҷашни байналмилалии Наврӯзи фархундапай дар шаҳри Душанбе бо кӯшиши нигоранда бо хатти сириллик ва ниёгон ба нашр расида, дар андак замон ноёб шуда, ҳамакнун бо хоҳиши мукаррари хонандагон ва алоқамандони Наврӯз, чопи ҷадиди осорро бо тағйирот ба нашр расонид.

Китоби дигар "Эмомалӣ Раҳмон Ҷамшеди рӯзгори мо " ҳам дар таҳияи Ҷаъфар Ранҷбар гирдоварӣ шудааст.

Он маҷмуаи мақолаҳоеро дар бар мегирад, ки муаллиф доктор Яқуб Ясно дар солҳои гуногун ба нашр расонида, хулосаи сафарҳои хешро баён намудааст.

Як қисми онҳо ба тозагӣ навишта шуда, бори аввал интишор мешаванд ва матолиби ҷолиберо дар бар мегиранд.

Гуфта шуд, ки донишманди муҳтарам доктор Яқуб Ясно шахсияти нотакрори сиёсӣ ва абармарди фарҳанггустар будани Президенти Тоҷикистонро равшан карда, саҳми ӯро дар раванди ислоҳоти ҷомеа муҳим арзёбӣ менамояд.

Инчунин, муҳаққиқ дар ин рисола ба омӯзиши таърихи куҳани Наврӯз изҳори назар намудааст. Ҳамзамон, муаллиф барои тақвияти фикраш аз як зумра мероси муштарак, ки барои эронитаборон баробарарзишанд, аз ҷумла китоби "Авасто" ва" Забон ҳамчун унсури ҳуввиятсоз" ва ҳамчунин, аз ҷашнҳои миллии Наврӯз, Тиргон, Меҳргон, Сада ва Чила ёд мекунад.

Таъкид шуд, ки китоби донишманди Афғонистон Яъқуб Ясно асари пураҳаммият буда, бори аввал чеҳраи ҳуввиятсоз ва фарҳангии Эмомалӣ Раҳмонро дар сатҳи байналмилалӣ равшан менамояд.

Инчунин, зикр гардид, ки муаллиф Тоҷикистонро ҳамчун улгӯ ба дигарон муаррифӣ карда, аз хидматҳои беназири Президенти кишвар, Эмомалӣ Раҳмон дар раванди ободкориҳои кишвараш ёдрас мешавад.

Дар идома иброз шуд, ки таҳқиқоти донишманди тоҷики Афғонистон Яъқуб Ясно як қадами ҷиддӣ дар таҳкими дӯстии давлатҳои ҳамҷавор буда, муҳаббати бепоёни ӯро ба мардуми тоҷик ва сарвари давлаташон нишон медиҳад.

Гулафшон КАРИМОВА, “ҶТ”