Ҷоми ҷаҳонии футбол-2026, ки барои нахустин бор бо ширкати 48 даста дар се кишвари мизбон -Иёлоти Муттаҳидаи Амрико, Канада ва Мексика баргузор мешавад, рӯз аз рӯз ба марҳилаи ҳассостар ворид мегардад. Аз 25 июн то 1 июл мусобиқа пур аз лаҳзаҳои ҳассос, ҳангомаҳои бузург ва рақобатҳои фаромӯшнопазир буд. Дар ин рӯзҳо марҳилаи гурӯҳӣ ба анҷом расида, даври плей-офф оғоз шуд ва акнун ҳар иштибоҳ метавонад ба поёни орзуи қаҳрамонӣ баробар бошад.

Рӯзи 25 июн чанд бозии сарнавиштсоз баргузор гардид, ки тақдири дастаҳоро дар гурӯҳҳои D, E ва F ҳал карданд. Дар яке аз рақобатҳои ҷолиб тими Эквадор Олмонро бо ҳисоби 2 бар 1 мағлуб кард. Ин натиҷа барои мухлисони олмонӣ зарбаи ҷиддӣ буд, зеро қаҳрамони чаҳоркаратаи ҷаҳон боз ҳам ноустуворӣ нишон дод. Дар бозии дигари муҳими рӯз Туркия бар Иёлоти Муттаҳидаи Амрико бо ҳисоби 3 бар 2 пирӯз шуд. Бозӣ хеле пуршиддат гузашта, ҳар ду даста то лаҳзаҳои охир барои ғалаба мубориза бурданд. Ҷопон ва Шветсия мусовии 1 бар 1 карданд, натиҷае, ки ҳар ду дастаро зери фишори ҷиддӣ гузошт. Ҳолланд бошад, бо бозии босифат Тунисро бо ҳисоби 3 бар 1 шикаст дод ва бо эътимоди бештар ба даври баъдӣ роҳ ёфт. Ҳамчунин, Кот-д Ивуар Кюрасаоро бо ҳисоби 2 бар 0 мағлуб кард, дар ҳоле ки Парагвай ва Австралия бо ҳисоби 0 бар 0 мусовӣ намуданд.

То 26 ва 27 июн тамоми рақобатҳои марҳилаи гурӯҳӣ анҷом ёфтанд ва номи ҳама дастаҳои роҳёфта ба плей-офф маълум гардид. Дар рӯзи 26 июн Франсия рақобати ниҳоят олӣ нишон дода, дар марҳилаи гурӯҳӣ Норвегияро бо ҳисоби калони 4 бар 1 мағлуб кард. Ин бозӣ бори дигар қудрати хатти ҳамлавии фаронсавиҳоро нишон дод. Сенегал низ бо ҳисоби бузурги 5 бар 0 Ироқро шикаст дода, ба даври баъдӣ бо руҳияи баланд роҳ ёфт. Кабо-Верде ва Арабис-тони Саудӣ бошанд, мусовии 0 бар 0 карданд. Марҳилаи гурӯҳӣ бо чанд сенсатсияи хурду бузург ҷамъбаст шуд. Бархе фаворитҳо бо душворӣ роҳхат гирифтанд ва бархе тимҳои камном худро ҳамчун неруи нав муаррифӣ карданд.

28 июн марҳилаи плей-офф оғоз гардид. Аввалин бозии даври 1/16 ниҳоят пуршиддат буд. Канада, ки яке аз мизбонони мусобиқа аст, бар зидди Африқои Ҷанубӣ ба майдон баромад. Рақобат то дақиқаҳои охир баробар ҷараён дошт, аммо дар лаҳзаҳои ҳалкунанда канадагиҳо тавонистанд голи пирӯзиоварро ба самар расонанд ва бо ҳисоби 1 бар 0 ғалаба кунанд. Ин пирӯзӣ барои футболи Канада аҳамияти таърихӣ дошт, зеро мизбонон бо дастгирии мухлисони худ ба даври баъдӣ роҳ ёфтанд.

29 июн шояд пурҳаяҷонтарин рӯзи мусобиқа то имрӯз гардид. Бразилия дар як рақобати сахту сангин бар Ҷопон бо ҳисоби 2 бар 1 пирӯз шуд. Ҷопониҳо боз ҳам бо интизоми хуб, тактикаи олӣ ва суръати баланд рақиби ҷиддӣ буданд, аммо маҳорати инфиродии ситораҳои Бразилия, махсусан Винисиус Жуниор фарқиятро ба вуҷуд овард. Сенсатсияи асосии мусобиқа дар бозии Парагвай ва Олмон рӯх дод. Вақти асосӣ бо ҳисоби 1 бар 1 анҷом ёфт ва тақдири роҳхат дар силсилаи пеналтиҳо ҳал шуд. Дар ин силсила Парагвай бо ҳисоби 4 бар 3 пирӯз шуда, Олмонро аз мусобиқа хориҷ кард. Барои олмониҳо ин нокомӣ баъд аз шикастҳои солҳои 2018 ва 2022, ки онҳо аз марҳилаҳои асосӣ хориҷ шуданд, боз як фоҷиаи навбатӣ гардид. Ҳангомаи дигарро Марокаш ба вуҷуд овард. Онҳо бар зидди Ҳолланд вақти асосиро бо ҳисоби 1 бар 1 анҷом дода, дар силсилаи пеналтиҳо бо ҳисоби 3 бар 2 ғалаба карданд. Марокаш акнун дигар танҳо як роҳёфтаи даври 1/16 нест, балки онҳо даъвогари воқеии роҳёбӣ ба марҳилаҳои болотар шудаанд.

30 июн рақобатҳо боз ҳам шиддат гирифтанд. Норвегия дар бозии ҷолиб Кот-д Ивуарро бо ҳисоби 2 бар 1 шикаст дод. Қаҳрамони асосии бозӣ Эрлинг Холанд буд, ки бо фишори доимӣ ба хатти муҳофизати рақиб мушкилоти зиёд эҷод кард. Дар бозии дигар Франсия яке аз намоишҳои беҳтарини тамоми мусобиқаашро анҷом дод. Онҳо Шветсияро бо ҳисоби калони 3 бар 0 шикаст доданд.

Ситораи асосии шаб Килиан Мбаппе буд, ки ду гол ба самар расонд ва бори дигар собит кард, ки яке аз хатарноктарин ҳамлагарони ҷаҳон аст. Бо ин пирӯзӣ Франсия паёми равшан фиристод, ки онҳо барои қаҳрамонӣ омадаанд.

1 июл рақобатҳои плей-офф идома кард. Яке аз натиҷаҳои муҳими имрӯз пирӯзии Мексика бар Эквадор бо ҳисоби 2 бар 0 буд. Мексика бо ин ғалаба ба даври 1/8 ниҳоӣ роҳ ёфт ва пас аз даҳсолаҳо яке аз беҳтарин натиҷаҳои худро дар Ҷоми Ҷаҳон нишон дод.

То имрӯз чанд ситора аз дигарон бештар дурахшиданд. Лионел Месси ва Килиан Мбаппе бо 6-голӣ беҳтарин нишонзанҳои мусобиқа мебошанд. Эрлинг Холанд 5 гол ва Винисиус Жуниор 4 гол ба самар расондаанд. Ҳар қадар мусобиқа ба марҳилаи ҳалкунанда наздик мешавад, мубориза барои унвони беҳтарин нишонзан низ ҷолибтар мегардад.

Ҷоми ҷаҳонии 2026 аллакай нишон дод, ки ин мусобиқа пур аз сенсатсия, драмаву эҳсосот аст. Суқути бармаҳали Олмон, пешрафти Марокаш ва Парагвай, дурахши Франсия ва устувории Бразилия нишон медиҳанд, ки мубориза барои ҷоми қаҳрамонӣ аз ҳар вақти дигар шадидтар шудааст. Акнун ҳар бозӣ аҳамияти финалро дорад. Ҳар гол метавонад таърих созад ва ҳар иштибоҳ метавонад орзуи як миллатро аз байн барад. Саволи асосӣ танҳо яктост, кадом даста рӯзи 19 июл дар Ню-Ҷерсӣ ҷоми қаҳрамони ҷаҳонро болои сар хоҳад бардошт?

Яҳё МАҲМАДНАБИЕВ, “ҶТ”