Чу Донюй, мудири кулли Созмони озуқаворӣ ва кишоварзии Созмони Милали Муттаҳид ваъда додааст, ки ба татбиқи боз ҳам бобарори ислоҳоти кишоварзӣ дар Ҷумҳурии Тоҷикистон мусоидат хоҳад кард.

Чу Донюй дар ин бора имрӯз - 25 апрел зимни суҳбат бо Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Рими Италия гуфтааст.

Тавре сомонаи расмии Президенти кишвар хабар медиҳад, имрӯз Пешвои миллат бо мудири кулли Созмони озуқаворӣ ва кишоварзии Созмони Милали Муттаҳид дар ин баробар масоили ҳамкории зич бо ин ниҳоди СММ ва амалисозии яке аз ҳадафҳои стратегӣ – таъмини амнияти озуқаворӣ дар Тоҷикистонор мавриди баррасӣ қарор додаанд.

Таъкид шудааст, ки беҳбуд бахшидан ба самаранокии соҳаи кишоварзӣ ва таҳкими рушди устувори ин бахш омили муҳими баланд бардоштани некуаҳволии мардуми деҳот аст.

- Ҷонибҳо омодагии худро барои идомаи робитаҳо ҷиҳати беҳсозии истифодаи заминҳои корам, пешгирӣ аз харобшавии онҳо ва ба истифода додани заминҳои нав иброз доштанд. Дар доираи пешбурди сиёсати инкишофи “Иқтисоди сабз”-и Тоҷикистон воридоти технологияҳои ниҳолпарварӣ баҳри барқарор намудани ҷангалзор, ҳифзи ҷангалу буттазор аз эрозия ва шусташавии заминҳо зарур шумурда шуд,- омадааст дар иттилоияи president.tj.