Бахшида ба 93-умин солгарди таъсисёбии нашрияи расмии Ҷумҳурии Тоҷикистон “Ҷумҳурият” дар толори нашриёти “Шарқи озод” ҷамъомади идона баргузор гардид. Дар он Масрур Абдуллозода, мушовири бахши Ёрдамчии Президенти Ҷумҳурии Тоҷикистон оид ба масъалаҳои иҷтимоӣ ва робита бо ҷомеа, Наҷмиддин Шоҳинбод, котиби Иттифоқи журналистони Тоҷикистон, Давлат Сафар, сардори Раёсати табъу нашри Вазорати фарҳанг ва сармуҳаррирони рӯзномаҳои “Ҷавонони Тоҷикистон”, “Садои мардум”, “Народная газета”, дигар намояндагони ВАО ва собиқ кормандони рӯзномаи “Ҷумҳурият” иштирок доштанд.

Дар раванди чорабинӣ аз нақши рӯзномаи мазкур дар худшиносӣ ва бедор кардани ҳисси меҳанпарастии миёни ҷомеа суханрониҳо ироа гардида, ҷойгоҳи онро дар миёни дигар расонаҳои кишвар калидӣ арзёбӣ карданд. Ҳамчунин гуфта шуд, ки рӯзнома аз аввали таъсисёбиаш вазифаҳои дар пеш гузоштаашро ба хубӣ иҷро намуда, бо Ситораи тиллоии сифат гардидааст.

Давлат Сафар зимни суханронии хеш аз хизматҳои ин рӯзнома ба хубӣ ёд карда, ба чанде аз кормандони он унвонҳои Аълочии матбуоти Тоҷикстон, Аълочии фарҳанги Тоҷикистон ва ифтихорномаҳои Вазорати фарҳангро тақдим кард. Наҷмиддин Шоҳинбод низ сипосномаҳои Иттифоқи журналистони Тоҷикистонро барои саҳми муносиб доштан дар тарғиби сиёсати давлатӣ ба як зумраи кормандони рӯзнома тақдим кард.

Қурбоналӣ Раҳмонзода, сармуҳаррири рӯзнома бо медали “100-солагии матбуот” қадрдонӣ гардида, ҳамчунин унвони “Сармуҳаррири сол”-ро сощиб шуд.

Дар охир собиқ кормандон ва сармуҳаррирони рӯзномаҳо аз даврҳои фаъолияти хеш дар ин рӯзнома бо хушӣ ёдовар шуда, “Ҷумҳурият”-ро мактаби бузурги тарбия ва бакамолрасии журналистони собитқадам унвон карданд.