Имрӯз зимни нишасти матбуотии Донишкадаи давлатии фарҳанг ва санъати Тоҷикистон ба номи Мирзо Турсунзода зикр гардид, ки феълан 14 нафар донишҷӯи Донишкада дар хориҷи кишвар таҳсил доранд.

Маҳмуд Назарзода, ректори Донишкада таъкид намуд, ки ҳамаи донишҷӯён дар зинаи бакалавр ва буҷавӣ таҳсили худро идома дода истодаанд. Онҳо аз рӯи ихтисосҳои "режиссёр" ва "ҳунарпеша" (актёрӣ) ба таҳсил фаро гирифта шудаанд.

Аз шумораи умумӣ, 9 нафар дар Донишкадаи давлатии фарҳанги Олтой ва 5 нафари дигар дар Донишгоҳи давлатии умумироссиягии кинематография таҳсил мекунанд.

Ҳамзамон, ректори Донишкада иброз дошт, ки то имрӯз бо зиёда аз 60 донишгоҳу донишкадаҳои кишварҳои хориҷии дуру наздик созишномаҳои ҳамкорӣ ба имзо расонида шудааст ва ҳамкориҳо дар самтҳои гуногун ба роҳ монда шудаанд.

Дар идома зикр шуд, ки феълан 60 нафар донишҷӯи хориҷӣ дар Донишкадаи давлатии фарҳанг ва санъати Тоҷикистон ба номи Мирзо Турсунзода таҳсил менамоянд ва дарсҳоро аз рӯи ихтисосҳои гуногун фаро мегиранд.

Гулафшон КАРИМОВА, “ҶТ”