Рӯзҳои 22-23 август дар шаҳри Душанбе Рӯзҳои фарҳангии Ҷумҳурии Қазоқистон дар Тоҷикистон баргузор мегардад. Рӯзҳои фарҳангии Қазоқистон дар Тоҷикистон дар ҳошияи сафари президенти ин кишвар - Қосим-Жомарт Токаев доир хоҳад шуд.

Чуноне ки Вазорати фарҳанги Тоҷикистон хабар медиҳад, дар доираи баргузории рӯзҳои фарҳангии Ҷумҳурии Қазоқистон 22 август дар Маҷмааи давлатии “Кохи Борбад” маросими ифтитоҳи расмӣ бо пешниҳоди барномаи консертӣ баргузор шуда, ҳунарҳои мардумӣ ва санъати тасвирии ҷониби Қазоқистон намоиш дода мешавад.

Ҳамчунин қарор аст ҳунарпешагони қазоқ дар Театри давлатии академии опера ва балети ба номи С.Айнӣ барномаи консертӣ иҷро намоянд.

Баргузории барномаҳои консертӣ дар шаҳрҳои Хуҷанд ва Бохтар низ дар назар аст.

Бояд гуфт, ки ҳамчунин дар Душанбе рӯзҳои 20-21 август рӯзҳои синамои Қазоқистон низ доир хоҳад шуд. Филмҳо дар кинотолорҳои “Ватан” ва кинотолори “Тоҷикфилм” намоиш дода мешаванд.

Сайёраи ҚИЁМИДДИН, “ҶТ”